Hevseroka PYD’ê Eyşe Hiso li ser êrîşa dewleta Tirk a dagîrker ya ser wargeha Mexmûr (Şehîd Rustem Cûdî) wiha got: “Helwesta hikumeta Iraqê ya li dijî êrîşa Tirkiyê ya ser wargehê têrê nake. Hikumeta Iraqê û Başûr Kurdistanê berpirsên êrîşa Tirkiyê ne.”
Wargeha Mexmûr (Şehîd Rustem Cûdî) ya li başûrê Kurdistanê gelek caran dibe hedefa artêşa Tirk a dagîrker. Herî dawî balafirên dewleta Tirk 15`ê Nîsanê wargeh kirin hedef. Di encamê de sê jinan jiyana xwe ji dest da.
Hevseroka PYD’ê Eyşe Huso diyar kir ku di van şertan de, li gel xetera li dijî mirovahiyê ji ber belavbûna Koronavîrusê, dewleta Tirk hovîtiya xwe ya li dijî kurdan eşkere dike.
Eyşe wiha dirêjî da axaftina xwe: “Di dema ku cîhan tedbîran li dijî Koronavîrusê digirin, balafirên dewleta Tirk êrişî wargehê dikin. Ev ji bo tevahiya dewletên cîhanê rûreşî ye. Di dema ku Koronavîrus li cîhanê belav dibe, dewleta Tirk faşîzma xwe eşkere dike û êrişî herêm û bajarên Kurdan dike.”
Eyşe bal kişand ser bangawaziyên NY û hêzên navneteweyî yên ji bo ragihandina agirbestek cîhanî û wiha dewam kir: “Digel vê jî dewleta Tirk li aliyekî êrişên xwe yên hovane li dijî herêmên Bakur û Rojhilatê Sûriyê jî didomîne, li aliyê din jî di 15`ê Nîsanê de bi balafirên xwe êrişî wargeha Mexmurê kir. Ji xwe ev bi mehane mexmûe di nav ambargoyek tengav û xeteriyê de ye.”
