Girtiyê Kurd Selîmî hat darvekirin

Girtiyê Kurd Mistefa Selîmî ji zindana Seqiz bi komek girtî re reviyabû. Pişt re ji aliyê hêzên ewlekariyê yên Herêma Kuristanê ve hatibûn binçavkirin û wan jî radestî rejîma Îranê kiribûn. Mistefa ji aliyê Îranê ve hat darvekirin.
Girtiyê Kurd Mistefa Selimî 27’ê Adarê bi gelek girtiyên din re ji zindana Seqiz fîrar kiribû û paşê li ser sînorê Başûrê Kurdistanê radestî Îranê hatibû kirin.
Li gorî tevna Mafê Mirovan a Kurdistanê, Mistefa Selîmî roja Înê danê sibê li zindana Seqiz hatiye darvekirin. Heman çavkaniyê ragihand ku cenazeyê Mistefa radestî malbata wî hatiye kirin.
Li gorî tevna Mafê Mirovan a Kurdistanê dema Misetefa Selîmî bi komek girtiyên din re ji zindana Seqiz firar dikin, bi çend kesan re berê xwe dabûn Başûrê Kurdistanê. Lê ji aliyê hêzên ewlekariyê yên Herêma Kurdistanê ve hatibûn binçavkirin û radestî Hikumeta Îranê kiribûn.
Selîmî ji sala 2003’yan ve bi egera pirsgirêkên civakî hatibû girtin û dihat gotin, endamê hizbeke Kurdî ye. Hizba Demokrata Kurdistanê, Hizba Demokrata Kurdistan a Îranê û rêxistina Kurdistanê a Hizba Komînîsta Îranê (Komele) diyar kiribûn ku Mistefa Selîmî ne endamê wan e.
Li gorî çavkaniyeke taybet ku agahî daye Rojnewsê, Selîmî dema bi komek girtî re firar dike, berê xwe dabû sînorê Başûrê Kurdistanê. Lê ji aliyê hêzên Herêma Kurdistanê ve li sînorê navçeya Pênciwên tê binçavkirin û dişînin Rojhilatê Kurdistanê.