KCK’ê bi daxuyaniyekê bal kişand ser rewşa rêber Abdullah Ocalan ku di dema pandemiya Koronavîrûsê (Covid-19) de agahî jê nayên girtin û wiha diyar kir: “Niha têkildarî tenduristî û ewleyiya Rêberê Gelê Kurd ti agahî nayên girtin. Di dema koronavîrûsê de mafê herî xwazayî ye ku malbat û parêzer derheqê tenduristî û ewleyiyê de agahiyê bistînin.”
Hevserokatiya Konseya Rêveber a KCK’ê têkildarî mijarê daxuyaniyeke nivîskî weşand û wiha da zanîn:
‘’Vîrûsa koronayê ku li seranserê cîhanê belav bûye, li Kurdistan û Tirkiyê di demeke kurt de belav bûye. Hatiye dîtin ku ev vîrûs li deverên sar û hêwî û li bajarên mezin pirtir belav dibe. Herwiha deverên ku mirov bi hev re lê dijîn, bi hev re lê dixebitin û çalakî tên kirin vîrûs bi leztir belav dibe. Ji ber wê tê gotin li girtîgehan rîska belavbûna vîrûsê zêdetir e. Jixwe ji ber vê sedemê saziyên mafên mirovan ku li cîhanê kar dikin, bang dikin ku di serî de girtiyên siyasî, girtî tev werin berdan. Ji ber vîrûsê tê xwestin ku girtiyên li Kurdistan û Tirkiyê û yên cezaxwarî werin berdan.
Dema vîrûsa koronayê li girtîgehên Tirkiyê û Bakurê Kurdistanê serdanên malbatan hatiye qedexekirin, axaftinên bi telefonan jî heftane bûne du car. Lê Rêberê Gelê Kurd li Îmraliyê ne dikare malbat û parêzerên xwe bibîne û li gel ku hatiye xwestin jî ne dikare bi malbat û parêzerên xwe re bi telefonê biaxive. Niha derbarê tenduristî û ewleyiya Rêberê Gelê Kurd de ti agahî nayên standin. Dema vîrûsa koronayê mafê herî sirûştî ye ku malbat, parêzer derheqê tenduristî û ewleyiyê de agahiyê bistînin. Ji vî alî ve pir girîng e ku derbarê tenduristiya Rêberê Gelê Kurd de agahî were standin. Gelê me dixwaze derheqê tenduristî û ewleyiya wî de agahiyê bistîne.
Di roja me ya îro de ku mirovayî tev di nava şokê de ye, ji her demê pirtir pêwîstiya civakê bi proje û pêşniyarên rêber Apo yên li ser pirsgirkên rûdidin, heye. Di vî warî de tenduristî, ewleyî û mercên azad ên xebatê yên rêber Apo di serî de ji bo gelên Tirkiye û Rojhilata Navî ji bo ji tevayiya mirovayiyê re xizmetê bike, erkê gelê me û mirovahiyê ye têkoşînê bike.
Divê gelê Kurd li gel hêzên demokratîk ên Tirkiyê û Rojhilata Navî dîsa raya giştî ya cîhanê di mijara tenduristî û ewleyiya rêber Apo de tim di nava têkoşînê de be, divê bilez agahiyek ji rêber Apo bê girtin.”
