Rêxistina Tenduristiyê ya Cîhanê (WHO) îdia dike ku li gorî rêgezên destûrê dimeşe, ango bê ku cudabûnê bixe navbera mirovan parastina mafên mirovan dike. Lê di rastiya xebata xwe de ne wisa ye û mafên mirovan binpê dike.
Li seranserê cîhanê Koronavîrus (Covid-19) bûyera herî girîng e û yekîtiya tevayiya cîhanê bi xwe re ava kir. Lê Rêxistina Mafên Mirovan û WHO ku rêgez û destûrên van rêxistinan li ser esasê mirovî hatine avakirin, ne wisa ye û berûvajî karê xwe tev digerin. Îsbata vê yekê jî, di demeke wiha de ku pêwîstiya Bakur û Rojhilatê Sûriyê bi alîkariyê heye ku parastina xwe ji Koronavîrûsê bike, rêxistinên tenduristiyê û yên parastina mafên mirovan bêdeng in.
Rêxistina Tenduristiyê ya Cîhanê 13’ê Adarê sindoqa alîkariya têkoşîna li dijî vîrûsê ragihand û bi armanca hevkariya kar û xebata cîhanî û parastina mirovan ji xetera vîrusê, destek da.
WHO PÎVANAN BINPÊ DIKE
WHO Tîrmeha 1946’an bi armanca piştgiriya qada tenduristiyê, bê cudabûn parastina gelan bike, herwiha cudabûnê nexe nava olan, siyaset, aborî û civakî hat avakirin. Lê di rastiya xwe de berûvajî rêgezên xwe tev digere. WHO li ser bingeha rêgezên li jor hatine diyarkirin, îsbata girêdana xwe bi rêgezên di destûrê de hatine diyarkirin, dike. Herwiha rêxistinê îşaret bi parastina selametiya tevayiya gelan dike, xwe dispêre hevkariya di navbera ferd û dewletan de û alîkariyên tibî dide her kesî.
WHO tevî ku destek da hikumeta Sûriyê û çeteyên dewleta Tirk ên bi navê “opozîsyona Sûriyê” lê heta niha ti alîkarî nedaye herêmên Bakur û Rojhilatê Sûriyê da ku pêşî li belavbûna Koronavîrusê bigire.
Hevserokê Desteya Tenduristiyê ya Bakur û Rojhilatê Sûriyê Ciwan Mistefa diyar kir ku têkilî di navbera wan û Rêxistina Tenduristiyê ya Cîhanê de heye, di demên dawî de gelek civîn bi hev re li dar xistin, Rêxistinê soza pêşkêşkirina alîkariyê da lê heta niha tiştek pêk neaniye.
WHO berûvajî destûr û rêgezên xwe tev digere
