Hunermendên Kurd û Ereb bi berhemeke hevpar çand û mîrasa dewlemend a herêmên Bakur û Rojhilatê Sûriyê destnîşan kirin. Berhem wê peyamê dide ku “Pêkhateyên li ser xaka pîroz dikarin bi hev re bi aştî bijîn.”
Hunergeha Welat, 12 hunermendên Kurd û 12 yên Ereb ên Bakur û Rojhilatê Sûriyê li Kela Cabirê ya li bajarê Tebqayê li rex çemê Firatê anîn cem hev û bi navê “Rewanê Resen” berhemeke nû derxist.
Berhema “Rewanê Resen” ji gelek stiran ji mîrasa Kurd û Ereb ên herêmê pêk tê.
Hunermendên Kurd di vê berhemê de gelek stiranên gelerî yên Kurdî, weke stirana “Hoy Hoy Mamo Ebasî” ya navdar û hunermendên Ereb bi dengê zelal strana “Emî ya Beyai El-Werid”, herwiha bi hev re stirana merdelî “Seadî” dibêjin.
Kîpa “Rewanê Resen” ji Wargeha Şehîd Welat hatiye tomarkirin û ji aliyê endamê Tevgera Mezopotoma ya Çand û Hunera Demokratîk Bêkes Darî ve hatiye amadekirin.
Mûzîkjen Bêkes Darî li ser vê berhemê diyar ki ku gelek zehmetî di dema amadekirina berhem de dîtine. Darî kêfweşiya xwe bi serkeftina berhem anî ziman.
Darî diyar kir ku armanca wan ji vê berhemê ew ku vê peyamê bidin ku “Pêkhateyên li ser vî erdî dikarin bi hev re bi aştî bijîn.”
Darî bîr xist ku kilîpa “Rewanê Resen” li Kela Cabirê hatiye kişandin û got: “Xwezaya kelê pir xweş e û xwedî nirxekî manewî ye. Kele di dema dagşrkirina DAIŞ‘ê de veguherîbû cihê tarî û zulma li ser jinan. Herwiha çeteyên DAIŞ‘ê kele kiribûn girtîgeha kuştin û işkencekirinê.”
Xebata amadekirina berhema “Rewanê Resen” 6 mehan dewam kir, klîp di nava 4 rojan de hat kişandin. 50 lîstikevanên ji Tevgera Mezopotamiya ya Çand û Hunerên Demokratîk, koma Şehîd Welat di vê berhemê de cih girtin. Herwiha 200 kesyaetên din ji herêma Tebqayê di nav de rûspiyên Ereb bi kon, hêştir, alavên dîrokî jî beşdarî kilîpê bûn. Hêzên Ewlekariya Hundir li ser ewleyî û parastinê sekinîn.
