Koordînasyona Kongreya Star – Rojava dayîka Rêber Abdullah Ocalan, Ûweyş di salvegera wefata wê ya 27‘an de bîr anî û got, “Dayîka Ûweyş wê weke nimûneya lehengî û serfiraziyê bimîne, bi saya wê riya me ya ber bi azadiyê ve ronî bû.”
Koordînasyona Kongreya Star – Rojava bi pêmana salvagera 27‘an a wefata dayîka Rêber Abdullah Ocalan, Ûweyş daxuyaniyeke nivîskî weşand.
Daxuyanî wiha ye;
“Dayîka Ûweyş mînaka jina azad a berxwedêr e, ku li hemberî şert û mercên jiyanê yên zehmet û astengiyên mezin ên di her aliyê jiyana malbatî, civakî û aborî de sekinî, teslîm nebû û zarokên xwe li ser giyanê berxwedanê mezin kirin.
Dayîka Ûweyş mîna dibistanekê bû, jiyana wê bi gelek mînakan, wekî sebir, tolhildan, redkirina teslîmbûnê, jiyana birûmet û azadîxwaziyê tijî bû. Ev taybetmendî zemîna avakirina kesayeteke fermandar û leheng mîna Rêber Abdullah Ocalan danî, yê ku ji zarokatiya xwe ve dest bi têkoşînê kir. Dayîka Ûweyş tevî ku xwendin û nivîsandin nedizanî, helwesta wê di jiyanê de, mîna îrade û israra li hemberî jiyanê hebû.
Dayîka Ûweyş nişan da ku azadî ji zarokatiyê ve dest pê dike, ev di perwerdekirina durist a Rêbertî û piştgiriya wî de diyar bû.
Serkeftinên mezin ên ku gelên Bakur û Rojhilatê Sûriyê, bi taybetî serkeftinên jinê, avakirina neteweya demokratîk keda Rêbertiyê ne. Rêbertiyê li hemberî xeta şofenîst, netewperest û sîstema kapîtalîst, neteweya demokratik da avakirin.
Di dawiyê de em dibêjin ku dayîka Ûweyş wê mînaka lehengî û serfiraziyê bimîne. Lewre bi saya wê riya me ya ber bi azadiyê ve ronî bû. Dayîka Ûweyş rêberê mezin xwedî kir, em bi saya wî azad dijîn.”
