Meclisa Malbatên Şehîdan a Herêma Cizîrê diyar kir ku şandina cenazeyê şehîd Egîd Îpek bi riya pakêtekê ji hêla dewleta Tirk ve kiryareke derexleqî ye.
Hikumeta Tirk cenazeyê şervanê HPG`ê Egîd Îpek piştî 3 salan bi pakêtekê ji malbatê re şand. Şehîd Egîd Îpek 2017`an li bajarê Dêrsim ê Bakurê Kurdistanê şehîd bûbû.
Meclisa Malbatên Şehîdan a Herêma Cizîrê têkildarî mijarê de daxuyaniyek da. Di daxuyaniyê de wiha hat gotin:
“Di vê demê de ku cîhan tev li hemberî Koronavîrûsê têkoşînê dike, dewleta Tirk a dagîrker bi her şêwazê hovane dijminiya gelê Kurd dike. Dewleta Tirk hewl dide bi riya çeteyên xwe yên nexweş vîrûsê li Bakurê Kurdistanê û Bakur û Rojhilatê Sûriyê belav bike.
Dewleta Tirk derheqê şervanekî HPG`ê de cûcekî hovane kir, cenaze parçe parçe kir û bi pakêtekê ji malbata wî re şand.
Dewleta Tirk a dagîrker û çeteyên wê kuştin, talankirin, lîstina bi cenazeyan li Serê Kaniyê, Efrîn û Girê Spî didomîne û ev ne tişteke nû ye. Dewleta Tirk cenazeyê şehîd Egîd Îpek ku ji bajarê Amedê ye bi pakêtekê ji malbata wî re şand û ev dûrî exlaq û mirovayiyê ye, herwiha ne li gorî zangonên navneteweyî ye.
Em Meclisa Malbatên Şehîdan nikarin vê bûyera biêş û sûcê hovane ji bîr bikin. Şandina cenazeyê şehîd bi vî awayî tê wateya ku hebûna gelê Kurd inkar dike. Em soz didin şehîd Egîd û dayikên şehîdan ku emê asta têkoşîn û fedakariyê bilind bikin da hesab ji sûcdarên şer, di serî de Erdogan û çeteyên wî bixwazin.”
