Artêşa Tirk a dagîrker û çeteyên wê yên ‘Artêşa Wetenî ya Sûriyê’ careke din av ji ser kantona Hesekê qut kirin.
24`ê Sibata derbasbûyî artêşa Tirk a dagîrker û çeteyan xebatkarên stasyonê derxistin û kar dan sekinandin. Lê piştî hefteyekê û piştî hevdîtinên di navbera Rûs û Tirkan de careke din stasyon xebitî.
Artêşa Tirk roja Şemiyê xebatkarên stasyona Elok derxistin û careke din av ji ser kantona Hesekê ku bi hezeran koçberên Serê Kaniyê û gundewarên wê qut kir.
Hevseroka Gerîndetiya Avê ya Kantona Hesekê Sozdar Ehmed ji ANHA’yê re wiha got: “Ji roja Şemiyê ve artêşa Tirk û çeteyên wê av ji ser şêniyên bajarê Hesekê û derdora wê qut kirine. Divê dewleta Rûsya ya garantor nehişta avê ji ser bajêr qut bikin. Lê erkê xwe pêk neanîn.”
Sozdar Ehmed diyar kir ku girtina stasyonê karesatek e ku zêdetirî 1 milyon kesî bêav dimînin û wiha axivî: “Em heta niha nizanin ka çima stasyon hatiye sekinandin. 3 roj in çete nahêlin xebatkaran derbasî stasyonê bibin.”
Sozdar da xuyakirin ku li gorî derfetên heyî dikarin avê bi stêran li şêniyan belav bikin, bîran bikolin û got gelek projeyên me hene, me dest bi hina kiriye.
Stasyona Elok a staratîjîk avê dide bajarê Hesekê, navçeya Til Temir, herêmên başûrê Hesekê mîna Hol, El-Erîşa, Şedadê û Mergeda. Her wiha avê dide kampên li herêmê mîna kampa El-Erîşa, Hol û Waşokanî.
