Dr. Ebdulxenî Suleyman diyar kir tedbîrên Rêveberiya Xweser a Bakur û Rojhilatê Sûriyê ji bo pêşîgirtina li belavbûna vîrusa Koronayê li herêmê digire, yên giştî ne û divê pêk werin û got, parastina şexsî parastina herî girîng e.
Pisporê nexweşiya sing Dr. Ebdulxenî Suleyman bal kişand ser parastina şexsî û wiha got: “Parastina şexsî parastina herî girîng e, mîna şûştina destan bi av û sabûnê bi dema 20 saniyeyan dem bi dem, çêkirina xwarinê bi taybetî goşt û hêkan bi awayekî baş, dûrxistina ji kesên biguman, dûrketina ji cihên zemhet.”
Desteya Tenduristî û Şandeya Aloziyê ya Rêveberiya Xweser a Bakur û Rojhilatê Sûriyê tedbîrên pêşîgirtina li belavbûna vîrûsa Koronayê li herêmê pêk tînin. Herwiha gelek biryarên parastinê (mîna paşxistina dewama dibistan û zanîngehan, rawestandina kombûn, girtina qehwexane û klûban, dezenfektekirina sazî û cihên giştî) girtin.
Dr. Ebdulxenî got, pêwîst e kesên bi sermayê ketîn serdana bijîşkan bikin û rewşa xwe paşguh nekin.
Li aliyekî din jî aliyên pêwendîdar ên Bakur û Rojhilatê Sûriyê xebata pêşîgirtina li vîrûsa Koronayê wek belavkirina belavokên danasîn û hemleyên dezenfektekirinê li sazî û cihên giştî pêk tînin.
Ji şêniyên bajarê Qamişlo Silava Îbrahîm got, divê em biryarên Rêveberiya Xweser ragihandîn, pêk bînin. Mîna danîna maske û lepikan, paqijkirina destan û baldariya ji belavbûna vîrûsê li herêmên me.”
