Projeya Dîcle ya xwedîkirina çêlekan li gundê Zixat ê girêdayî navçeya Dêrikê, li ser asta Bakur û Rojhilatê Sûriyê projeyeke tekane ye û beşeke pêwîstiya herêmê ji şîr, mast û penîr peyda dike.
Projeya Dîcle ya xwedîkirina çêlekan ji hêla Saziya Çandinî û Xwedîkirina Sewalan ve ya girêdayî Navenda Geşepêdana Aborî ya Dêrikê ve hat amadekirin. Destpêkê projeyeke piçûk a xwedîkirina çêlekan bû. Lê pişt re fireh bû û êdî li ser asta Bakur û Rojhilatê Sûriyê bûye projeyeke nimûne.
Di projeyê de 6 axurên taybet ên çêlekên berhemdar û golikan hene.
Di Projeya Dîcle de li derdora 500 serî çêlek hene. Piştî firehkirina projeyê, 400 serî pez jî lê hatin zêdekirin.
Projeyê derferên kar ji gelek malbatan re peyda kirin. Di vê dawiyê de derfetên kar ji bo koçberên ku neçar mane ji warên xwe koçber bibin, peyda kir. Piraniya wan ji herêmên Serêkaniyê ne. Di projeyê de 12 malbat kar dikin.
Projeya Dîcle rojane derdora tonek û nîv şîr hildiberîne. Ew hilberîn ji sûkan re tê şandin. Tevî wê jî beşek ji bo çêkirina mast û penîr tê veqetandin.
Berpirsê projeyê Ciwan Sîd derbarê mijarê de got, “Li ser asta Bakur û Rojhilatê Sûriyê ev projeya ya yekemîn e. Tevahiya pêdiviyên wê bi keda karker û berpirsên wê tên peydakirin.”
