PAJK: Agirên ku em li ser banan û kolanên xwe pê bixin, wê ruhê Newrozê zindî bihêle. Divê gelê me di warê tendirustiyê de xwe biparêze û teqez agirekî Newrozê pê bixe.
PAJKê bi daxuyaniyekê cejna Newrozê pîroz kir û ev nirxandin kir: ‘”Cejna Newrozê ya ku gelên Rojhilata Navî dikevin roj û saleke nû, li pêş me ye. Gelên li herêmê bi coş û heyecaneke mezin Newrozê pîroz dikin û ji bo Kurdan jî cejna netewebûnê ye. Ev rastî bi meşa hebûn û azadiya ku Rêbertiya me daye destpêkirin, wateyeke xurt wergirtiye. Li bal Kurdan Newroz tê wateya berxwedan, hebûn û azadiyê. Di serî de berxwedêrê mezin Rêber Apo, em di şexsê Mazlûm Doganê Kawayê Hesinkar ê hemdem, Zekiye, Ronahî, Bêrîvan û Ûgûr Şakar de, Cejna Newrozê ya şehîdên xwe, gelê xwe û rêhevalên xwe yên ku li her dera dinyayê li ber xwe didin, pîroz dikin.”
Di dewama daxuyaniyê de wiha hat gotin: Her Newroz ji bo gelên Kurdistanê dibe destpêkeke nû. Kurd bi têkoşîna li dijî Dehakê zalim pêşiya tevayiya etnîsîteyan vekiriye û li dijî Dehakên hemdem têkoşîna xwe didomîne. Ji DAIŞ’ê heta faşîzma AKP û MHP’ê li dijî tevayiya hêzên faşîst têkoşîna xwe didomîne û pergala xwe ya azadiyê jî ava dikin.
