Jinên Girê Spî yên ku koçberî Kantona Kobanê bûyîn, derbarê Newrozê de hestên xwe anîn ziman û gotin: “Her sal bi dilekî germ me Newroza xwe pîroz dikir û têkoşîna xwe di Newrozê de dida diyarkirin. Îsal jî tevî êrîş, koçberî û qedexekirinê, emê li ber deriyên mala xwe agirê Newrozê geş bikin.”
Dayîka bi navê Emîna Mustefa diyar kir ku her sal berî 21’ê Adarê cejna Newrozê amadekariya xwe dikirin û got: “Me bi şev agirê Newrozê geş dikir, bi roj jî, me cil û bergên Kurdî li xwe dikirin û Newroz pîroz dikir. Bi salan e em cejna Newrozê pîroz dikin, lê îsal ji ber belavbûna vîrûsa korona em nikarin weke her sa pîroz bikin. Dîsa jî emê li ber deriyê mala xwe agirê Newrozê geş bikin, ji bo ku ew ruh bi me re zindî bimîne.”
Jina bi navê Leyla Xalid jî hestên xwe wiha anîn ziman: “Her sal 21’ê Adarê me li bajarê xwe pîroz dikir, lê îsal em koçber in û Newroz cudahiyeke xwe heye. Piştî belavbûna vîrûsa Korona, şahiya Newrozê weke her sal nayê lidarxistin. Dewleta Tirk û hevkarên wê ji bo tinekirina me êrîşî me kirin û em ji ser axa me koçber bûn. Tevî êrîş û koçberiyê jî emê dîsa agirê Newrozê li ber deriyê mala xwe geş bikin û Newroz 2020’an bi ruhekî germ pîroz bikin.”
Ciwana bi navê Necmê Mihemed jî Newroza 2020’an li gelê Bakur û Rojhilatê Sûriyê pîroz kir û got, “çawa Kawayê Hesinkar şeva Newrozê agir geş kir, têkoşîn kir û roja nû hilat, emê jî bi wî ruhî têkoşîn bikin û li hember dijmin bi ser bikevin. Tevî ku em koçber bûne emê Newoza xwe pîroz bikin.”
Zaroka bi navê Emîna Xalid jî got em her sal vê rojê bi geşkirina agir û gerandina govendê pîroz dikin. Newroz li gelê Kurd pîroz be.”
