Dilîn EHMED/Ronahî Qamişlo
Bi pêmana 32. ya salvegera komkujiya Helebceyê, meclisên bajarê Qamişlo û gel pênc deqîqeyan bêdeng rawestiyan.
Di 16`ê Adara 1988`an de komkujiya Helebce çêbû. Bi vê pêmanê gel û meclisên bajarê Qamişlo li qada teqîna Taxa Xerbî, pênc deqîqeyan bêdeng li ser giyanê şehîdên Helebcyê sekinîn û şehîdên azadiyê bîr anîn. Herwiha li ser komkujiyên li ser gelê Kurd çêbûyîn, bi taybetî komkujiya Helebceyê, ji aliyê meclisan ve, daxuyaniyek hat xwendin.
Di bîranînê de rêvebera Kongra Star a Qamişlo Menîca Heyder, li ser komkujiyê ji rojnameya me re axivî. Menîca wiha got: “Bi destê faşîst Sedam Huseyn bi çekên kîmyayî, ser 5500î re Kurd şehîd bûn. Em şehîdên vê komkujiyê û şehîdên azadiyê her sal bi rêzdarî bîr tînin. Çawa ku tê zanîn êrîşên niha li ser Bakur û Rojhilatê Sûriyê, ji aliyê dewleta Tirk ve tê kirin, berdewama vê komkujiyê ne.”
Menîca Heyder di dawiya axaftina xwe de bang li gelê Kurd kir ku, li xwîna şehîdan û destkeftiyan xwedî derkevin. Menîca axaftina xwe wiha bi dawî kir: “Ji bo ku em derfetê nedin dewletên desthiladar armanca xwe pêk bînin, divê em têkoşînê pêş bixin. Bi taybetî em bang li jinan dikin ku, dijmin her tim di êrîşên xwe de vîna jinan dike hedef. Ji ber wê pêwîst e em li ber xwe bidin. Encax bi berxwedanê em pîlanên dagîrkeran têk bibin.”
