Li sûkên gerok her pêdiviya welatiyan peyda dibe

Ji ber erzaniya bihayê pêwîstiyan û ji ber ku her tişt lê peyda dibin, sûkên gerok rastî eleqeyeke mezin ya şêniyên navçeya Girkê Legê û Çilaxa tên.
Bi daketina nirxê lîrayê Sûrî li hemberî dolar, bihayê pêwîstiyan bilind bû. Ji ber wê elaqeya şêniyan a ji sûkên gerok re ku her roj li cihekî tê danîn û bi navê wê rojê tê naskirin, zêde dibe. Li van sûkan bihayê pêdiviyan ji deverên din erzantir e.
Li navçeya Çilaxa ya girêdayî kantona Qamişlo sûka Sêşemê heye.
Kamîreya ANHA‘yê di nava sûkê de geriya û nêrînên hin şênî û firoşkaran girtin.
Sûk li qadek berfireh di nava taxan de ye û nêzî sûka bajêr e. Şaredariya Gel ev cih ji bo vê sûkê diyar kiriye.
Sûk serê sibehan heta berêvarê vekirî ye. Ji şînkayî heta, cil, caw û hwd welatî pêdiviyên xwe ji vê sûkê dikirin.
Welatî dibêjin her tişt li vê sûkê heye û bihayê pêwîstiyan kêm e.