Ahmet Aktaş
Di Pêvajoya Yekê de, Rêber APO peyamek şand Newroza 2013’an a Amedê û di çarçova vê peyamê de li Rojava Şoreş pêk hat.
Di Pêvajoya Dudan de, em dibînin dîsa Rêber APO peyamekê dişîne û di çarçova vê peyamê de dîsa li Rojava(26’ê Nîsana 2025’an) Konferansa Yekrêzî û Yekhilwesta Netewî pêk hat.
Di heman rojan de, ji bo yekrêziya Rojhılat jî Konferansek hêja hat lidarxistin.
Ma gelo van pêşvehatinan, van bûyerên giring, hema jiber xwe ve pêktên û hema ji nişkave, bêyî amadekariyên giring û mezin derdikevin holê?
Na xêr!
Ev pêşkeftinên giring û watedar, van mitîng û civînên xwedî mijarên dîrokî, di encama serêşên mezin ên Rêber APO û hewldanên canbexşane ên Tevgêra Azadiyê û gelê Kurdistanê de tên afirandin.
Jixwe hîn di pêvajoya yekê de, gelek partî, rêxistin û kesan, gotin û hilwestên pir xerab, bêûjdan û bêexlaq nîşan dan.
Lê eha bi şênberî li ber çavê raya giştî cîhanê ye, ku Şoreşek wisa pêkhat û di nava dozde salan de, xwe gihand encamên pir bi rûmet û her wiha ji aliyê Rojhilata Navîn û cîhanê ve, bi rêzdarî tê pesinandin û pejirandin.
Bêgûman ev teqdîr û razîbûna raya giştî cîhanê, ji cewherê hêja yê naveroka vê şoreşî tê; ji nezerî û kiryarê wê tê, ji pêşengiya jinê û ciwanan a vê şoreşê tê. Bi gotinek din, ji cewherê felsefe, bîrdozî, zihniyet û hilwesta Rebêr APO tê.
Ji bo Pêvejoya Dudan, dijberî û bangeşiyên xerab, li goreyî Pêvajoya Yekê pir kêm in, heta mirov dikare bêje, ji bilî Hakan Fidan û hevalê wî Mihemmed Colanî, yên berê dujminantî dikirin jî, vê carê piştgriyên xwe nîşan dan.
Ev tê wateya ku, him zemîn û him şensê serkeftina vê Pêvajoya Dûdan, ji ya berê zêdetir e.
Erê dîsa xeter hene; kelem, asteng, xêrnexwaz hene û wê hebîn, lê derfetên vê carê pirtirin ji yên berê.
Li aliyê din, bandora berfireh a giring û dîrokî ya deskeftiyên van pêvajoyan divê zelaltir werin zanîn.
Çawa di serketina şoreşê de para parçeyen din hebûn, nuha jî çawa di serkeftina Konferansa Yekrêzî û Yekhilwestiya Kurdî de para wan parçeyan hene, her wiha bandora erênî ya serkeftina van pêvajoyan jî, li ser hemû perçeyan û dostên gelê Kurdistanê ewqas heye.
Her çendîn saziya KNKê ya sîwana yekitiya netewi ya bi rûmet a gelê Kurdistanê heye û di kombûna vê Konferansê de pir hewldan jî kiribe, nuha encama vê Konferansa hêja, wê zemînê berfirehtirkirina KNKê jî xurtir bike.
Kurt kurmancî, ji nuha û pêve, van cûre pêşhatin ên di asta netewî de, wê hevdû himbêz bikin û hevdû xurtir bikin.
Her wiha konjoktora herêmî û cîhanê, êdî di Rojhilata Navîn de weke aktor, Israilê û Kurdistanê derdixin pêş.
Ew aktoriya Receb Erdoganê ku xwe cîgirê Bush, ê Projeya Mezin a Rojhilata Navîn didît, êdî çû sergoyê dîrokê.
Her wiha Îran jî ketiye devê tivinga Trump, heke Îran, êdî dev ji wê hovîtiya xwe ya ku keç û xortên Kurdistanî lidar dixin, bernede û hişê xwe nede serê xwe, li nêz aqûbeta Seddam tê serê wan.
