Gelê Bakur û Rojhilatê Sûriyê ji Koalîsyona Navnetewî xwest ku bila qedexeya hewayî bê îlan kirin û hêza aştiyê li herêmê bi cih bibe.
Sed hezaran welatiyên herêmên Bakur û Rojhilatê Sûriyê, li dijî êrîşên dewleta Tirk û bêdengiya navnetewî ya li dijî êrîşan berê xwe dan baregeha Koalîsyona Navneteweyî ya li gundê Xerabişikê yê li başûrê rojhilatê Kobanê.
Şandeyeke şêniyên Bakur û Rojhilatê Sûriyê bi reyadarên Koalîsyona Navneteweyî re li baregeha Xerabişikê ya li kantona Kobanê civiya û daxwaz kir ku Neteweyên Yekbûyî li herêmê bi cih bibe û êrîşên dagirkeriya Tirk ên li ser axa wan rawestînin.
Hat gotin ku, şandeyê ji rayedarên koalîsyonê xwestiye ku helwesta xwe li hember gefên Tirkiyê nîşan bidin, her wiha endamê şandeyê nameyek tê de daxwaza gelên herêmê nîşan dide, radestî rayedarên koalîsyonê kir ku ji serokê Amerîkayê Donald Trump re bişînin.
Piştî ku şandeyê bi reyadarên koalîsyonê re hevdîtin kir daxuyaniyek da.
Di daxuyaniyê de bang li Neteweyên Yekbûyî hat kirin ku li hemberî êrîşan berpirsyariyên xwe bi cih bîne û qada hewayî ya Bakurê Sûriyê ji balafirên şer ên dewleta Tirk re bigirin, êrîşên dagirkerên Tirk ên li ser axa Bakurê Sûriyê rawestînin”.
