Buroya Xebitandinê ya girêdayî Komîteya Karûbarên Civakî a Meclisa Sivîl a Reqayê derfetên kar ji zêdetirî 2 hezar û 500 kesan re peyde kirin.
Meclisa Sivîl a Reqayê di 18`ê Nîsana 2017`an de hate damezirandin. Ji nava Meclîsê Buroya Xebitandinê ya girêdayî Komîteya Karûbarên Civakî û Kar hat ava kirin. Buro hewl dide derfetên kar ji welatiyan re peyde bike.
Ji bo peydekirina derfetên kar gelek welatî serlêdana buroyê dikin û navên xwe tomar dikin.
Buroyê ji bo peydekirina kar ji hemû beşên civakê re di saziyên sivîl ên girêdayî Meclisa Sivîl a Reqayê û rêxistinên mirovî de dixebite.
Hejmara kesên ku navê xwe li buroyê tomar kirine 20 hezar e. Heta niha zêdetirî 2 hezar û 500 kes di nav sazî û meclisan de hatine bi cih kirin.
Têkildarî mijarê Endamê Rêveber ê Buroya Xebitandinê ya girêdayî Komîteya Karûbarên Civakî Ibrahîm El-Neîmî wiha got: “Ji bo derfetên kar rojane welatî serlêdana buroyê dikin û navên xwe tomar dikin. Kesên ku tomar bûne wê bi rêya pêşbirkan û li gorî asta xwendinê û pîşeyên wan werin pejirandin.”
El-Neîmî wiha got: “Di rojên pêş de wê derfetên kar hîn bêtir ji welatiyan re were dîtin. Di vê mehê de pêşbirka nobetdariya dibistanan heye û wê 600 karkerên mêr û 300 karkerên jin bên qebûlkirin û wê li Komîteya Perwerde û Fêrkirinê ya Meclisa Sivîl a Reqayê werin erkdarkirin.”…ANHA
Ji 2 hezar û 500 kesî re kar hat dîtin
