Azadî Helebce
Rêber Apo dibêje ku şoreşa jin di nav de nebe, ne mimkun e bi ser bikeve. Eger şoreş bi pêşengtiya jin be mînaka wê ya herî berbiçav şoreşa Bakur û Rojhilatê Sûriyeyê ye. Ev şoreş weke şoreşa jin hatiye naskirin. Jin di vê şoreşê de bi roleke pêşeng rabûye. Di hemû qad û saziyên eskerî, civakî, siyasî û hwd. de jin cih digirin. Jinên ji bo bidestxistina azadiyê di nav berxwedanê de, li hember her zahmetiyê têkoşînekê bêhempa dimeşînin.
Ev meş jî bê berdêl nabe. Ji dayika Gulê Selmo ya li Helebê di êrîşa çeteyan de şehîd bû heya şehîdên weke Arîn Mîrkan, Avêsta Xabûr, Jiyan Tolhildan, Rîhan Amûdê û bi sedan şoreşgerên ji bo şoreşa jinê bigihînin serkeftinê ji bedena xwe parçe dane bûne gazî û birîndar hene.
Gaziyên şer ji bo di mijara jineolojiyê de -ku Rêber Apo jî pir girîngiyê didiyê- xwe bêhtir serwext bikin pêşniyara perwerdeyekê kiribûn. Ev pêşniyar ji aliyê Akademiya Jineolojiyê ya Bakur û Rojhilatê Sûriyeyê ve bi erênî hat qebûlkirin. Di navbera 6-8’ê Gulanê de bi tevlîbûneke zêde ya gaziyên şer ên Kurd û Ereb perwerdeya jineolojiyê hat dîtin. Perwerde ji aliyê endama Akademiya Jineolojiyê Roza Hesekê ve hat dayîn.
Di roja yekem a perwerdeyê de mijarên weke “Çima jineolojî? Armanc ji jineolojî çi ye? Rêber Apo çawa nêzî mijara jinê dibe?” hatin nirxandin û nîqaşkirin. Hate diyarkirin ku Rêber Apo di parêznameya Sosyolojiya Azadiyê de pêşniyara jineolojiyê kiribû.
Her wiha hat diyarkirin ku cara destpêkê fermandara gerîla û endama PAJK’ê şehîd Leyla Agirî li çiyayên Kurdistanê dersa jineolojiyê daye gerîlayên azadiyê û ev xebat piştre li hemû qadên cîhanê belav bûye. Di roja yekemîn a perwerdeyê de têkildarî kar û xebatên jineolojiyê jî sînevîzyonek jî hat temaşekirin.
Di roja duyemîn de jî perwerde bi pirs û nîqaşên têkildarî “azadî, pîvanên jin û mêrê azad çi ne?” berdewam kir.
Rojeva roja sêyem a perwerdeyê jî hevjiyana azad bû. Heman rojê li ser mijara wateya hezkirinê jî hat rawestîn. Di nîqaşan de hat diyarkirin ku hezkirin di heman demê de lêgerîneke azadiyê, domandina şopa Rêbertî, şehîdan û gihiştina armancên azadî û wekheviyê ye. Her wiha nirxandinên Rêber Apo ên têkildarî hevjiyana azad jî hatin xwendin.
Gaziyên şer ên tevlî perwerdeyê bûn diyar kirin ku di van sê rojan de asoya wan berfirehtir bûye. Tiştên ji perwerdeyên bi vî rengî yên îdeolojîk werdigirin wê bixin xizmeta şoreşê.
