Asya Weşûkanî
11’ê Gulana 1992’yan fermandar û qehremana Kurd Mizgîn (Gurbet Aydin) li gundewarê Tatwan a girêdayî herêma Xerzanê di encama xiyaneteke tarî de ku leşkerên dagirker cihê lê dimîne dorpêç dikin, hevrê Mizgîn heya guleya xwe ya dawî li ber xwe dide û tevlî karwanê nemiran dibe. Şehadeta fermandar Mizgîn ji her kesî re bû cihê xemgîniyeke gelekî mezin. Li pey şehadeta jina şoreşger û efsanewî Mizgîn gelek şêrejin û keçên çeleng berê xwe dane çiyayên Kurdistanê û navê xwe kirin Mizgîn. Gelê herêma Tatwanê piştî şehadeta qehreman Gurbet Aydin, bûn welatparêzên herî ji dil û piştgiriya gerîlayên çiyayî kirin. Fermandar Mizgîn bi zanebûn, sebir û insiyatîfa xwe dihate naskirin. Gelekî jî xwedî dengekî zelal û xweş bû. Mizgîn fermandar û hunermend bû. Ji wan hevalên jin bû yên di salên 1980’yan de beşdar bibûn. Li cih û qadên herî zor û zehmet têkoşîneke herî giranbuha meşand. Heval Mizgîn fermandar û lehenga azadiyê ye.
Fermandar Mizgîn li herêma Mêrdînê, li cihên şert û mercên herî giran cihê xwe digirt û ji wir derbasî cem Rêber Apo dibe. Perwerdeyê dibîne û piştî wê derbasî qada Ewropayê dibe. Rêber Apo hevala Mizgîn erkdar dike û weke rêvebera tevgara jin ji bo pêkanîna Kongreya YJWK’ê dişîne welatên derve. Pêşenga jin Mizgîn di wê kongrê de bi roleke pir xurt radibe û weke pêşenga Yekîtiya Jinên Welatparêzên Kurdistan tê erkdarkirin. Dema vedigere Rojavayê Kurdistanê careke din Rêber Apo, hevala Mizgîn erkdar dike û dişîne herêma Xerzanê. Hevala Mizgîn hem di rêveberiya eyaletê de cih digire, hem jî di nav gel de xebatan dimeşîne.
Gelê herêmê gelekî ji hevala Mizgîn hez dikir û pê bawer bû. Lê xiyanet careke din serê xwe radike û dibe sedema şehadeta hevrê Mizgîn. Dema hevala Mizgîn derbasî gundekî dibe ji milê kesên xayîn ve agahî ji dijmin re tê dayîn û dijmin dora mala ku fermandar Mizgîn lê dima dorpêç dike. Hevrê Mizgîn ji dayika malê re ya du zarokên wê hene re dibêje: “Ez pir baş dizanim ku wê dijmin dev ji me bernede. Ti zarokên xwe bibe derve, da ku hûn neyên kuştin. Her çiqasî dayik qebûl nake jî fermandar û leheng Mizgîn wê îqna dike û dişîne derve. Hevrê Mizgîn ji bo nekeve destê dijmin çalakiya fedaî pêk tîne.
Qehreman û şêrejina Kurd Mizgîn bi wêrekî û çelengî gihişt şehadetê. Ew ji bo me bû pêşeng û xwedawend. Heval û fermandar Mizgîn jineke jîr û jêhatî bû. li her cihê ku derbas dibû bi reng û dengê xwe weke jineke fermandar û jixwe bawer beşdarî nav kar û xebatên têkoşînê dibû.
Fermandar û qehremanên weke Mizgîn qet namirin û her di dil, ruh û fikrên me de wê bijîn û wê her hebin. Em hemû şervan û şagirtên xwedawend Mizgîn in. Em soz didin tola Mizgîn û tevahî şêrejinan rakin, hedef û armancên wan pêk bînin.
