Ayşa Silêman/ Dêrik
Bi boneya Roja Zimanê Kurdî Rêveberiya Dibistanên bajarê Dêrik, Yekîtiya Mamosteyan û Saziya Zimanê Kurdî bi dirûşmeya ‘Perwerdeya bi zimanê dayîkê mafekî rewa û bingehîne’ li bajarê Dêrikê meşek li darxistin.
Bi boneya 15’ê Gulanê Roja Zimanê Kurdî Rêveberiya Dibistanên bajarê Dêrik, Yekîtiya Mamosteyan û Saziya Zimanê Kurdî bi dirûşmeya ‘Perwerdeya bi zimanê dayîkê mafekî rewa û bingehîne’ li bajarê Dêrikê meşek li darxistin. Di meşê de hemû endam û mamosteyên dibistanan hazir bûn.
Meş ji pêşiya Meclisa Malbatên Şehîdan bi dirûşmeyên ‘Ziman Rûmeta me ye, zimanê me nasnameya meye’ dest pê kir û li pêşiya çerxereya Şehîdan veguherîn mîtîngê.
Di destpêkê de hemû kesên başdarê meşê bûbûn bi xuleyek bêdeng li ser giyanê şehîdan rawestiyan, paşê ev roja pîroz diyarî hemû şehîdan hat kirin.
Di berdewamiya meşê de daxuyanî ji bo 15’ê Gulanê hat xwendin.
Di destpêka daxuyaniyê de bal hat kişandin li ser kêf û coşa xwendekaran ku gelekî mezin e, roja zimanê kurdî
pêşwazî dikin û ji niha ve vê roja dîrokî, li gelê xwe pîroz dikin. Ne tenê ew, belê hemû têkoşerên û azadîxwazên doza Kurdistanê ku ji bo vê doze têkoşiyane, li benda vê kêliyê bûn. Hevdemî van guhertinên ku li herêmê rêdidin û bi saya keda bênavber a şehîd û xebatkaran, îro doza neteweya me derbasî qonaxa nû bûye û êdî dem hatiye ku destkeftiyên şoreşa me bên misoger kirin. Destkeftiya herî pîroz jî ku nirxên kurdan ê herî bilind e û divê di destûrê de fermî bê naskirin. Her wiha pêwîste ji ber salên tunekirin û qedexekirinê ve ji hemû hêlan ve bê qerbûkirin.
Di berdewamiya daxiyaniyê de wiha hat gotin: “Di vê sala dîrokî û qedirbşha de, em hemû şehîdên doza azadiyê û tevaya xebatkarên kurdiyê bi rêz û hurmet bi bîr tînin. Em her wiha bang li civaka xwe dikin ku li vê boneya pîroz, roja zimanê kurdî, xwedîtiyê bike û tevlî bibe. Bila hemû rojên me rojên zimanî bin, barê zimanê xwe divê em bi hev re rakin. Ji ber ku saleke taybet e, em ê li gel hemû saziyên perwerdeyê yên Rojavayê Kurdistanê û herêma Bakur û Rojhilatê Sûriyê , ji niha ve dest bi çalakiyên roja zimanî bikin ku van kêliyên dîrokî bi hev re vejînin.”
Di dawiya meşê de helbesta ku Rêberê mirovahiyê Rêber Apo ji bo zarokan şandî hat xwendin.
