Bi sedan welatiyên bajarê Qamişlo li pêşiya buroya Neteweyên Yekbûyî ya bajarê Qamişlo kom bûn û bang kirin da ku rê li pêşiya bidarvekirina çalakvanê siyasî yê Kurd Ramîn Hisên Penahî bê girtin.
Faris Xelo yek ji welatiyên ku beşdarî çalakiyê bibû axivî û got, “Em îro li vir kom bûne da ku siyasetên û binpêkirinên rêjîma Îranê ya der heqê ciwan û siyasetmedarên Kurd, bi taybet biryara darvekirina kurdan şermezar bikin. Armanca me ji vî çalakiyê ew e ku dengê xwe bighînin civaka navdewletî û Neteweyên Yekbûyî yên, ku erka xwe ya parastina mirovan, her wiha parastina ciwanên Kurd ji rêjîma Îranê ya fîşist pêk bînin.”
Xelo, di nava axaftina xwe de îşaret bi rêxistinên mafê mirovan ên navdewletî kir û wiha pê de çû, “Heke ku banga parastina mafê mirovan dikin, pêwîste ku erka xwe ya li hember gelên bindest bi taybet gelê Kurd bi cih bînin.”
Welatiya bi navê Ayhan Mûrad, ji aliyê xwe de anî ziman ku pergalên desthilatdar bi hemû rêbazan şerê gelê Kurd ê azadîxwaz dike û wiha domand, “Polîtîkeyên bi armanca qirkirina fîzîk, fikirî, çandî û siyasî yên der heqê gelê me de hîna berdewam e. Binpêkirinên Îran ên darvekirina ciwan û siyasetmedarên Kurd hê jî didome. Em li vir kom bûne da ku nerazîbûnên xwe li hemberî van kiryararan, her wiha bêdengiya civaka navdewletî nîşan bidin.”
Ayhan Mûrad di berdewama axaftina xwe de, anî ziman ku her çiqas tundî li ser gelê Kurd zêde bibe îradeya gel jî zêde dibe û ev wiha got, “Keç û xortên gelê me yê Kurdistanê hemû Ramîn Penahî û hevalên wî ne, em ê heya dawî şopdarên xeta Ramîn Hisên Penahî bin.”
Welatiyê bi navê Silêman Ebû Bekir jî beşdarî çalakiyê bibû, diyar kir ku rêjîma Îranê bi kirayên xwe yên ne mirovî û cezayê darvekirina çalakvanên Kurd ên daxwaza mafê xwe dikin, hemû pîvanên mirovî bin pê dike.”