Li navçeya Raco ya Efrînê di encama çalakiya sabotajê ya YPG’ê de 2 leşkerên Tirk û 2 çeteyên wan hatin kuştin.
Navenda Ragihandinê ya YPG’ê li ser mijarê daxuyaniyeke nivîskî weşand.
Li gorî daxuyaniyê, 29’ê Tebaxê yekîneyeke YPG’ê li gundê Berbenê yê navçeya Raco ya Efrînê li dijî bendeke kontrolê ya leşkerên Tirk û çeteyên Firqet Hemze çalakiyeke sabotajê pêk anîn.
Hate ragihandin ku di encama çalakiyê de 2 leşkerên Tirk ên dagirker û 2 çeteyên wan hatine kuştin, 2 çete jî birîndar bûne.
BI DEHAN SIVÎL HATIN REVANDIN
Ji aliyê din ve hat ragihandin ku, artêşa Tirk a dagirker û çeteyên wê yên Feyleq El-Şam danê êvarê avêtin ser gundê Kibêşînê yê navçeya Şêrawayê. Di serdegirtinê de bi dehan sivîl hatin revandin.
Hin gundî ji bo nekevin destê dagirkeran ber bi dehl û rezê xwe ve reviyan. Gundiyan gotin, leşker û çeteyên ku avêtin ser gund, êşkence li gundiyan kirine û malên wan talan kirine.
ÇETE ÇEKAN DIFIROŞIN Û DIREVIN
Her wiha hat ragihandin ku çeteyên El-Cebha El-Şamiye çekên xwe difiroşin û ber bi Tirkiyê ve direvin. Hat diyar kirin ku artêşa Tirk a dagirker 500 çete ji korîdora Bab El-Hewa ya di navbera bajarê Reyhanli ya girêdayî wîlayeta Hatay a Tirkiyê û El-Etarib a girêdayî parêzgeha Heleb a Sûriyê anîn û heta niha jî li wê derê ne. Tê payîn ku wan tev li şerê li Idlibê bikin.
