Li bazara Sêgur her tişt erzan e

Ji ber erzanî û bihayê guncwa welatî berê xwe didin Sûka Înê ya bajarokê Sêgur.
Li bajarên herêma Cizîrê gelek sûkên gelêrî yên heftane hatine danîn. Her sûkek navê xwe ji rojên hefteyê digire.
Sûka bajarokê Sêgur ê girêdayî navçeya Dirbesiyê roja înê vedibe. Ji ber guncawbûna buhayên wê welatî berê xwe didin sûkê û pêdiviyên xwe bi cih tînin.
Tevî firotina sewal û motorsîklêtan, hemû cureyên sebze, fêkî, kelûmelên xwarinê, cilên nû û kevn û hemû pêdiviyên malan li sûkê peyde dibin.
Welatiyê bi navê Xelef El-Ehmed yek ji avakerên sûkê ye, wiha got: “Ji destpêka aloziya Sûriyê ve ez û tevî 3 bazirganên din me sûk ava kir.”
El-Ehmed diyar kir ku sûk di destpêkê de tenê sûka sewalan bû. Lê piştî peydebûna derfetên kar gelek beş di sûkê de vebûn û sûk berfireh bû.
Welatiyê bi navê Taha Şêx Ibrahîm ê ji navçeya Amûdê diyar kir ku ew ji bo kirîna pêdiviyên malê her roja Înê serdana sûka Sêgur dike.
Welatiyê bi navê Ehmed Xelîl ji bajarokê Zerganê diyar kir ku di van rojên dijwar de û ji ber guncawbûna buhayan, bi hezaran şênî serdana sûkê dikin…ANHA