Zanîngeha Kobanê sala nû ya perwerdeyê bi zêdekirina 2 beşan pêşwazî dike. Zanîngehê beriya 3 rojan qebûlkirina daxwaznameyên tomarkirinê di hemû beşan de ragihandibû.
Tomarkirinê roja sêşemê dest pê kiribû û wê heta roja pêncşemê 13’ê Îlonê bidome. Her wiha navên ku hatine pejirandin wê piştî hefteyekê ji bidawîbûna tomarkirinê bên ragihandin.
Rêveberiya zanîngehê zêdekirina du beşan; zanyariyên xwezayî li Zanîngeha Kobanê û Beşa Wêjeya Erebî li bajarê Girê Spî ragihand.
Girêdayî şert û mercên tomarkirinê rêveberiya zanîngehê ev şert rêz kirin: divê xwendekar Sûriyeyî be, ji bilî zanîngeha Kobanê li tu zanîngehekê din tomar nekiribe, divê bawernameya amadehî (zanyarî û wêjeyî) girtibe. Her wiha rêveberiyê diyar kir ku girîngî ji bawernameyên Rêveberiya Xweser a Rojava tê dayîn.
Rêveberiya Zanîngehê bi bîr xist ku hejmara xwendekarên sala borî gihişt dehan xwendekar. Ev weke serkeftinek zanîngeha Kobanê tê dîtin. Hejmara kadroyên perwerdê gihişt 15 mamoste. Hinek ji wan li zanîngehên Heleb û zanîngehên din ên Sûriyê perwerde dane û gelek ji wan bawernameya Master qedandine.
Zanîngeha Kobanê bi awayekî fermî di 10’ê Kanûna 2017’an de hate vekirin. Her wiha di 4’ê Nîsana îsal de Rêveberiya Xweser a Kobanê û bi hevkariya Rêxistina Hêvî, kevirê bingehîn ê projeya avakirina Zanîngeha Kobanê danî. Piştî bidawîbûna avakirina zanîngehê, tê payîn ku bibe mezintirîn zanîngehên Rojava û gelek xwendekar ji derveyî Sûriyê wê pêşwazî bike…ANHA
Zanîngeha Kobanê xebatên xwe fireh dike
