Tîmên Destwerdanên Destpêkê ji Mizgefta Kevn a bajarê Reqayê 30 cenaze derxistin.
Çeteyên DAIŞ`ê piştî ku bajarê Reqayê dagirkirin komkujî pêk anîn û ji bo ku komkujiyên wan neyên zanîn cenaze di gorên komî de vedişartin.
Tîma Destwerdanên Destpêkê 30 cenaze li Mizgefta Kevn derxistin. Ev cenaze piştî ku ji aliyê bijîşkan de werin naskirin, wê navên wan werin nivîsandin û radestî malbatên wan werin kirin.
Ji destpêka ku bajarê Reqayê ji çeteyan hate rizgarkirin heta niha nêzî 2 hezar û 50 cenaze ji gorên komî hatine derxistin. Hinek ji cenazeyên ku hatin rakirin ji aliyê malbatên wan ve hatin naskirin û hinek ji wan jî heta niha nehatine naskirin û di goristana Til El-Bîa de têne veşartin.
Yek ji rêvberên Tîma Destwerdanên Destpêkê Yasir El-Hisên anî ziman ku wan li ser banga şêniyan cenaze ji Mizgefta Kevn rakirin û wan radestî malbatên wan dikin. El-Hisên diyar kir ku hemû cenazeyên ji mizgeftê hatin derxistin ji aliyê malbatên wan ve hatin naskirin û heger malbatên wan ne amade bin ew cenazeyan dernaxin.
Yek ji şêniyên bajarê Reqayê Faris Mihemed diyar kir ku dema çeteyên DAIŞ`ê derbasî bajêr bûn û tîma 17`an dorpêç kirin û ji ber ku wan nikarîbû xwe bighînin goristana Til El-Bîa ji ber wê wan cenazeyê birayê xwe di mizgeftê de defin kir.
Mihemed di axaftina xwe de desntîşan kir ku wan alîkarî ji Tîma Destwerdanên Destpêk xwestin da ku cenazeyê birayê wî ji mizgeftê derxînin û li goristana Til El-Bîa defin bikin.
Hêjayî gotinê ye ku çeteyên DAIŞ`ê li bajarê Reqayê komkujî pêk anîn û ew di gorên komî de defin kirin da ku komkujiyên xwe veşêrin.
