Komên dîlanên folklorîk, stran û şanoya zarokan ên herêma Cizîrê xebatên xwe yên amadekariyê dikin da ku beşdarî Mîhrîcana 4`mîn a Hunera Zarokan bibin.
Bi sponsoriya Desteya Çand û Hunerê Mîhrîcana 4`mîn a Zarokan li ser asta herêma Cizîrê wê di 1`ê Îlonê de were lidarxistin. Ji ber vê yekê komên zarokan li navendên çand û hunerê yên herêma Cizîrê amadekariyan dikin da ku tev li mîhrîcanê bibin.
Mîhrîcan wê di 1`ê Îlonê de dest pê bike û 9 rojan wê dewam bike. 6 rojên destpêkê wê li navenda Aram Tîgran a bajarokê Rimêlan a girêdayî kantona Qamişlo werin lidarxistin û 3 rojên din wê li Navenda Çand û Hunerê ya Serêkaniyê ya girêdayî kantona Hesekê dewam bike.
DIRBÊSIYÊ
Koma Arîn Mîrkan a dîlanan a navçeya Dirbesiyê ji 12 keçên ciwan pêk tê. Koma Viyan Peyman a stranan ji 23 zarokan pêk tê û koma şanoyê ji 15 zarokan pêk tê, kom amadekariyên xwe dikin da ku tev li mîhrîcanê bibin.
Rêveberên navendên çand û hunerê destnîşan kirin ku dema zarokan bihîst mîhrîcan wê were lidarxistin moralê wan pir xurt bû û endamên navendê yekser dest bi amadekariyên pêwîst ji bo tev li mîhrîcanê bibin, kirin.
AMÛDÊ
Li navçeya Amûdê Navenda Çand û Hunerê ya Hûrî wê bi 3 koman tev li mîhrîcanê bibe. Her komek ji 11 zarokan pêk tê. Ji ber vê yekê Navenda Hûrî perwerdeyên xwe di vî alî de zêde kiriye.
Yek ji rêveberên Komîteya Çand û Hunerê ya navçeya Amûdê da zanîn ku ew wek navçe wê bi 3 koman tev li 4`mîn Mîhrîcana Zarokan bibin û ji ber wê niha perwerdeyên xwe zêde kirine…ANHA