Endama Rêveberiya Kampa Serdemê ya Kantona Şehbayê Hêvîn Reşîd diyar kir piştî ku dewleta tirk û komên girêdayî wê êrîşî Efrînê kirin aramî û demokrasî bi dawî bûye û got: “Qirkirin, talan, destdirêjî, revandin û binpêkirina mafên mirovan niha li Efrînê didome. Gel li Efrînê di nava şert û mercên giran de dijîn. Li dijî van kiryaran bêdengiya cîhanê dewam dike.”
Endama Rêveberiya Kampa Serdemê ya Kantona Şehbayê Hêvîn Reşîd diyar kir piştî ku dewleta tirk û komên girêdayî wê êrîşî Efrînê kirin aramî û demokrasî bi dawî bûye û anî ziman ku têkoşîna wan a ji bo aştiyê û azadiyê didome.
Hêvîn Reşîd da zanîn ku gel ji ber zilmê ji Efrînê direvin û derbasî Şehbayê dibin û got: “Gelê li Efrînê dijîn ji ber zilma dewleta tirk û komên girêdayî wê direvin û derbasî Şehbayê dibin. Kesên ku ji ber zilma dewleta tirk û komên wê derbasî Şehbayê dibin tînin ziman berî ku dewleta tirk û komên girêdayî wê êrîşî Efrînê bikin Efrîn derek ewle bû. Lê dibêjin ku niha tenê zilm li Efrînê tê kirin. Rewşa gelê ku niha li Efrînê ne her ku diçe ber bi xeteriyê ve diçe.”
Hêvînê da zanîn ku bi taybet jin li Efrînê di rewşek xirab de ne û wiha dawî li axaftina xwe anî: “Jin li Efrînê tên revandin, tên tecawizkirin û ji hemû mafên xwe bêpar tên hiştin. Di bin çarşefa reş de wekî koleyan tên bikaranîn. Divê hemû jinên cîhanê li dijî vê yekê bertek nîşan bidin û rabin ser piyan. Divê em hemû jinên cîhanê bibin yek û li dijî zihniyeta ku jinê diçewisîne têkoşînê bikin. Em li vir di nava şert û mercên dijwar de li dijî zilmê têdikoşin û têkoşîna me ya ji bo aştî û azadiyê didome. Hêviya me ew e ku hemû jinên cîhanê piştgiriyê bidin me.”…JINNEWS
