Dîlan Mulhim/Qamişlo
Nivskara kurd Nêrgiz Ismayîl diyar kir ku Îsal rêjeya tevlîbûna jinan di Pêşengeha Şehîd Herekol ya Pirtûkan de li gorî salên borî zêdetir e û got, “Jinan bi helbest, çîrok, roman û nivîsên xwe 8. Pêşengeha Şehîd Herekol xemilandine.”
Desteya Çandê ya Herêma Bakur û Rojhilatê Sûriyê bi koordîneya Desteya Çandê ya kantona Cizîrê salane Pêşangeha Pirtûkan a Şehîd Herekol li dar dixe. Gelek çapxaneyên xwecih û yên navneteweyî beşdar dibin. Îsal jî 8’emîn pêşangeha şehîd Herekol di 15’ê Cotmehê de bi dirûşma “Ka em xwendinê bikin şêweyekî jiyanê” li hola Zana ya bajarê Qamişloyê dest pê kir û di 22’ê Cotmehê de wê bidawî bibe. Di pêşengehê de 54 çapxane û saziyên wêjeyî bi 143 hezar pirtûk û bi 15 hezar sernavan beşdar bûne.
Derbarê 8. Pêşengeha Şehîd Herekol û rêjeya tevlîbûna jin, nîvîskar û rojnamevan Nêrgiz Ismayîl ji rojnameya me re axivî.
Nêrgiz Ismayîl di destpêka axafitina xwe de wiha got; “Ev sala duyeme ku Kovara Afaq El-Mera tevlî pêşengeha Şehîd Herekol ya Pirtûkan dibe. Sala borî em bi sê hejmaran tevlî pêşengehê bûn, îsal jî em bi 9 hijmaran beşdar bûn. Pêşengeha Şehîd Herekol ji bo jinên nivîskar, helbestvan û romanivîs defeteke başe ku karîn nivîsên xwe bi zimanên cur bi cur di pêşengehê de, bidin pêşandan.”
Asta beşdarbûna jinê di pêşengehê de
Nêrgiz Ismalî da xuyakirin ku jin bi rêy pênûsa xwe bîr û baweriya xwe belav dike û wiha got: “Lidarketina Pêşengeha Şehîd Herekol û Bilindbûna asta tevlîbûna jinê di pêşengehê de cihê şehnazî û serbilndayiyê ye. Îro em di nava şoreşeke rewşenbîrî û zanistî jî de ne. Pêşengeheke salê carekê tê li darxistin, lê ew cara ku tê lidarxistin beramberî gelek piroje, deskeftî û serkeftinên rewşenbîrî ye. Jin jî di aliyê xwe yê xweser de dixwaze ku bi pênûsa xwe asoyê jinê, pêşketina jinê, bîr û baweriya jinê bi riya nivîs û pirtûkan belav bike û pêş bixe. Çiqas teknolojiya li pêş be jî, lê pêşengeh hebûn û wateya pirtûkan diparêze.
Zanista jinê di pêşengehê de
Nivîskar û Rojnamevana kurd Nêrgiz Ismayîl axaftina xwe wiha qedand: “Di pêşengeha Şehîd Herekol a Pirtûkan de azadiya pênûsê heye, di heman demê de kar û xebateke baş tê meşandin, ji ber vê yekê ev pêşengeh serkeftinek û gaveke pir girîng û dîrokî ye. Em dixwazin ku di salên bê de hejmara tevlîbûna jinan di pêşengehê de zêdetir be û jin karibin zanista xwe delav bikin.”
