Ahmet Aktaş
Dibe ku sernivîs balkêş û nakok were dîtin; ji ber aştî û şer wê çawa werin ba hevdû? Lê mixabin hatin e ba hevdû û dibe ku siberojê dîsa werin ba hevdû. Çawa? Di 1’ê Îlona sala 1939an de, artêşa faşist a Hitler, êrîşa dagirkerî ajot ser Polonyayê û şerekî mezin derket holê. Jixwe şerê cîhanî yê 2an li ser vê êrîşa dagirkerî despêkir. Bi giştî êrîşkariya Hitler, ji aliyê herdû aliyên dijber ewqas xeter hat dîtin ku, di bin serokatiya DYEyê de dewletên emperyalîstên Rojava û di pêşengtiya Sovyet Rûsyayê de eniya Rojhilat, li dijî faşîzma Hitler bûn yek.
Her wiha bi encama vê lihevhatina navnetewî re, di destpêkê de(1981’an)1’ê Îlonê(roja dagirkirina Hitler a Polonya), pişt re(2001an) 21’ê Îlonê, ji aliyê Saziya Netewên Yekgirtî(NY) ve weke Roja Aştiya Cîhanî hat pejirandin û ragihandin. Ev, ji aliyê cîhanî ve bû û her wiha tê dîtin ku peywendiyên aştî û şer çawa dikarin bi hev re bin. Ji aliyê Kurdistanî ve jî, bûyerên giring û watedar ên di vê heyvê de rûdan e hene.
Her çar pêşengên çalakiya rojiya mirinê ya 14’ê Tîrmehê(1982’an); M.Hayrî Durmuş, Kemal Pir, Akif Yilmaz û Ali Çîçek di vê heyva Îlonê de şehîd ketin e. Her wiha bi êrîşa hewayî ya dewleta faşîst a Tirk(2011’an), Rustem Cûdî şehîd keti ye. Di 16.9.2022 de, bi êrîşa polîsên dewleta qirker a Îranê Jîna Emînî hat şehîd kirin. Erê, bi van êrîşên xedar ên faşîzmê re, gelek rûdanên xemgin hatin serê gelan û tevgêrên azadîxwaz. Lê weke di van mînakan de jî hatin e dîtin, van êrîşên dilêş û xemgîn, bi xwe re li dijî xwe çalakî, serîhildan û hwd. bûyerên bi rûmet jî diafirînin. Weke bi mînaka êrîşa ser Polonyayê re şerê cîhanê 2’an destpêkir; êş, elem, keder pêkhat, lê di heman demê de li dijî wan, li gelek welatan şoreş hatin afirandin û her wiha Roja Aştiya Cîhanê jî hat ragihandin. Mînaka çalakiya lehengî ya 14’ê Tîrmehê û şehadeta hevalên pêşeng, bi xwe re rih û îradeya ji pola ya xweragir a berxwedêr a şoreşgerî afirand. Her wiha di encama van çalakiyên qehremane de, Pêngava 15’ê Tebaxê(1984’an) hat lidarxistin û Şoreşa Rojava pêkhat û hwd.destkeftiyên hêja û bi rûmet hat bidestxistin. Bi mînaka berxwedana Jîna Emînî re, gelê me yê Rojhilat rabû ser piya, bandora xwe li hemû parçeyên Kurdistanê, Îranê, herêmê û cîhanê jî kir.
Her wiha dewleta kevneperest a mêtinger û qirker Îran lerizî, mîna erdhejê lêhat û her wiha her sê dewletên din ên mêtinger jî hatin tirsandin. Wisa diyar e ku, Hitlerê vê serdemê, wê bibin Receb û Netanyaho; yek êrîşên qirkeriyê dibe ser gelê Kurdistanê, yê din jî dibe ser gelê Filistînê. Çawa Hitler bû sedema cenga 2’an a cîhanê û di encama faşîzma xwe de şikest û xwe kuşt(intixar kir), Receb û Netanyaho jî bûne pêşengên (kujerên)qirkeriya cenga 3’an a cîhanê û wê bi aqûbeta Hitler, di xwîna xwe de bixeniqin! Û dirûşma Rêber APO Jin, Jiyan, Azadî biserdikeve!
