Oldaran hovîtiya dewleta Tirk li dijî gorên şehîdan şermezar kirin

Yekitiya Oldarên Dêrikê û Meclisa Rûspî û Eşîran a herêma Cizîrê destdirêjiya artêşa Tirk a dagirker û komên çete yên girêdayî wê li dijî gorên şehîdan ên herêma Efrînê şermezar kirin. Oldar û rûspiyan piştrast kir ku ev kirinên wan derveyî nirxên exlaqî û pîvanên olî ne.
Di çarçoveya helwestên li dijî hovîtiya artêşa Tirk a dagirker û komên çete yên girêdayî wê de li herêma Efrînê, Yekitiya Oldarên Dêrikê li Navenda Olan çalakiyek li dar xist û bi daxuyaniyekê destdirêjiya dagirkeran li gorên şehîdan ên herêma Efrînê bi tundî şermezar kir.
Daxuyanî ji aliyê endamê rêveberiya Navenda Olan Seîd Husam ve hate xwendin û hemû şehîdên rûmetê û mirovahiyê hatin bibîranîn. Di daxuyaniyê de ev tişt hate gotin: “Li ser navê oldarên Dêrikê em hovîtiya artêşa Tirk û komên çete yên girêdayî wê li Efrînê bi tundî şermezar dikin. Tu ol û şerîetên Xweda û ne jî pîvanên mirovî û pîvanên navneteweyî destdirêjiya li dijî mezarên şehîdan qebûl nakin. Ev kirinên artêşa Tirk li Efrînê heman kirin û destdirêjiyên terorîst in.”
Di daxuyaniyê de hate destnîşankirin ku tu carî ola îslamê fermana destdirêjiya mirovan nade û heman tişt di belgeyên navneteweyî de hatiye piştrastkirin.
Girêdayî heman mijarê Meclisa Rûspî û Eşîran a herêma Cizîrê daxuyaniyek da. Daxuyanî ji aliyê Şêx Sînan Ehmed ve li navenda meclisê hate xwendin. Di vê daxuyaniyê de jî wiha hate gotin:
“Em van destdirêjiyên hovane û tirsonek ên çeteyên Erdoganê mongolî û koleyên wî ku xwe wek artêşa azad bi nav dikin, li dijî mezarên şehîdan ên herêma Efrînê bi tundî şermezar dikin. Hovîtiya atêşa Tirk û çeteyên wê li dijî xanî û dar û beran jî pêk hat. Artêşa Tirk û çeteyên wê xaniyên sivîlan hilweşandin û daristanên herêmê dişewitînin. Her wiha destdirêjiyê li gorên şehîdan dikin ku rihê van şehîdan wek dirindeyan di jiyana van çeteyan de ye.
Lehengiya şehîdan bêguman dê veguherin dibistanên jiyana azad û her çi qas hovîtiya van komên terorîst û artêşa Tirk li dijî gelên herêmê zêde bibe, tu carî vîna azad a van gelan naşikê.
Bêhna xwîna şehîdan hêza me di parastina rewa de xurttir dike û tu hêz nikarin nasnameya me tune bikin. Em rehmeta şehîdan ji Xweda dixwazin. Bimire dewleta Tirk a faşîst.”