Berdevkê fermî yê QSD’ê Kîno Gabriel îdiayên dezgehên çapemeniyê yên têkildarî beşdarbûna QSD’ê di şerê Idlibê de li rex hêzên rêjîmê derewand.
Dezgehên ragihandina Tirk îdia kirin ku hejmareke şervanên Hêzên Sûriya Demokratîk (QSD) li rex hêzên rêjîma Sûriyê beşdarî şerê Îdlibê bûne.
Girêdayî mijarê Berdevkê Fermî yê QSD’ê Kîno Gabriel axivî û diyar kir ku ew ji bo rizgarkirina hemû herêmên Sûriyê ji destên terorîstan û dagirkeriya Tirkiyê amade ne, lê ti rastiya nûçeyên hin dezgehên çapemeniyê ku dibêjin şervanên QSD’ê beşdarî şerê Idlibê bûne tune ye û heta niha tu şervanên QSD’ê ji bo şerê Idlibê yan herêmeke din nehatine şandin.
Gabriel diyar kir ku QSD tenê xwe dispêre bangên welatiyan û heta niha tu hevpeyman an planeke leşkerî di navbera wan û hêzên rêjîmê de derbarê şerê Îdlibê de pêk nehatiye.
Gabriel di berdewama axaftina xwe de diyar kir ku eger welatî ji bo rizgarkirina wan ji bin dagirkeriya dewleta tirk û çeteyan bang bikin, an rêjîma Sûriyê wan vexwîne wê li gorî hevpeymanekê plansaziya xwe ya beşdarbûna şerê Îdlibê eşkere bikin û wiha dewam kir: “Bêguman di navbera her du aliyan de berjewendiyên hevbeş wê pêk werin.”
Girêdayî mijara rizgarkirina Efrînê ji bin dagirkeriya Tirkiyê û çeteyên wê Gabriel wiha got: “Mijara Efrînê armanca me ya sereke ye û ji bo rizgarkirina wê em plan û amadekariyên xwe dikin.”
Berdevkê Fermî yê Hêzên Sûriya Demokratîk Kîno Gabriel di dawiya axaftina xwe de diyar kir ku ew ji diyalogê re amade ne da ku ewlehiya Sûriyê were parastin û şerê terorê were kirin. Gabrîel wiha dawî li axaftina xwe anî: “Em amade ne ji bo vê jî li gel aliyên pêwendîdar danûstandinan bikin.”
QSD’ê beşdarbûna şerê Îdlibê derewand
