Tevî hemû êrîşên dagirkeriyê û dorpêçê jî gelê Efrînê berxewdana xwe didomîne û dev ji feraseta xwe ya komînal bernade. Çar gundên navçeya Şêrawa ku li derveyî dagirkeriya dewleta Tirk mane jiyana xwe ya komunal didomînin. Meclîsa çar gundan pêdiviyên jiyanî ji bo şêniyên wan gundan bi cih tîne.
4 gundên navçeya Şêrawa ya girêdayî kantona Efrînê ji destpêka dagirkirina Efrînê ji aliyê artêşa tirk û çetreyên wê de hatine dorpêçkirin. Şêniyên wan gundan tenê bi alîkariyên komînan pêdiviyên xwe peyda dikin û rojê 2 seatan ceyranê dibînin.
Dewleta Tirk a dagirker û çeteyên wê bi piştgiriya hêzên navnetewî Efrîn dagirkirin 4 gundên (Birc El Qas, El Zoq El Kebîr, Kilote û Başemrê) girêdayî navçeya Şêrawa ji derveyî dagirkirinê man niha di bin dorpêça dagirkeran de ne. Dagirker destûrê nadinku pêdiviyên jiyanî derbasî wan gundan bibin. Şêniyên van gundan warên xwe bernedan û bi sedan şêniyên Efrînê pêşwazî kirin.
Komînên van gundan bi derfetên xwe yên kêm û sînordar, alîkariyên jiyanî didin şêniyan.
Girêdayî vê mijarê hevserokê meclisa her çar gundan Ebdulfetah Hemo wiha got: “Ji destpêka dagirkirina Efrînê ve, em bi derfetên xwe yên sînordar alîkariyê ji şêniyên gund û şêniyên Efrînê re ku li gund bi cih bûne, pêşkêş dikin.”
Hemo destnîşan kir ku ew mehê du caran alîkariya madeyên xwarinê ku ji berhemên navçeyê ne, wekî kartol û pîvaz li ser şêniyan belav dikin. Hemo di dawiya axaftina xwe de diyar kir ku ji ber dijwarbûna peydakirina sotemenî, ji ber dorpêçê, ew kehrebeyê rojê tenê 2 saetan didin gundan…ANHA
