Endamê Konseya Serokatiyê ya MSD’ê Hesen Mihemed Elî derbarê hevdîtinên MSD û rêjîmê de diyar kir ku her du alî jî dibêjin cihê dewleta Tirk li Sûriyê tune ye. Mihemed Elî wiha got, “Nêrîna me her du aliyan ew e ku Tirkiye dewleteke dagirker e, di nav de Efrîn, gelek herêmên Sûriyê dagir kiriye. Armanca me ya sereke rizgarkirina Efrînê ye.”
Endamê Konseya Serokatiyê ya MSD’ê Hesen Elî bal kişand ser hevdîtinên xwe yên bi rejîmê re û got, “Her du alî dibêjin, cihê dewleta Tirk li Sûriyê nîne.”
Endamê Konseya Serokatiyê ya Meclîsa Sûriya Demokratîk (MSD) Hesen Mihemed Elî ji ANHA’yê re axivî û diyar kir ku krîza li Sûriyê bi rêya diyalogê çareser dibe. Elî got, “Şer û bikaranîna çekan em gihandin vê radeyê ku zerareke mezin li civakê bû. Me dît ku çek tenê dikare li dijî çeteyên ku êrîşê dibin ser civakê bên bikaranîn.”
Elî li ser rojeva hevdîtina bi rejîma Sûriyê re ev agahî da:
“Di destpêka civînê de pêşniyarên me yên der barê rêveberiyên xweseriya demokratîk û herêmên ji DAIŞ’ê hatin rizgarkirin, rêveberiyên sivîl, serketinên gelê Bakurê Sûriyeyê hebûn. Ev nimûneyên azadî û demokrasiyê ne. Me dikarî ewlehiya herêmên xwe biparêzin.
Benda me ya sereke di civînê de; di rêveberiyên Bakurê Sûriyê yên xweser û herêmî de hemû ol, mezheb û pêkhate beşdar dibin. Rejîma Sûriyeyê jî 107 qanûnên taybet bi rêveberiyên herêmî yên Sûriyeyê pêşniyar kirin û biryar da ku li ser van mijaran nîqaş bike û çareyên guncaw jê re peyda bike. Li gel wan jî danûstandinên aliyan wê dewam bikin.
Îdiayên dibêjin wê herêm radestî rejîma Sûriyeyê werin kirin, armanc jê tevlihevî derxistin e. Em tekez dikin ku herêmên bi xwîna lehengan hatine rizgarkirin ne mijara bazirganiyê ne û bi ti awayî em vê mijarê bi kesî re parve nakin.”
ARMANCA SEREKE
RIZGARKIRINA EFRÎNÊ YE
Elî da xuyakirin ku hevdîtinên bi rejîmê re dewam dikin û li ser Efrînê jî got, “Nêrîna me her duyan ew e ku Tirkiye dewleteke dagirker e, di nav de Efrîn, gelek herêmên Sûriyê dagir kiriye. Li gorî her du aliyan cihê Tirkiyê ne li Efrînê û ne jî li herêmên din ên Sûriyê tine ye.
Girêdayî dagirkirina Efrînê, diyalog bi dewletên cîhanî re hene. Ji ber bûye mijareke girêdayî dewletên cîhanê û rejîma Sûriyê jî. Madem ku armanca me yekîtiya xaka Sûriye ye, rizgarkirina Efrînê wê ji hemû herêmên ku Tirkiyê dagir kirine re nameyek be. Armanc û erka me ya sereke rizgarkirina Efrînê ye.”
