Bi armanca nirxandina pêşketinên dawîn li herêmê û Sûriyê, Buroya Têkiliyên Dîplomasî ya Giştî ya Meclisa Sivîl a Dêrazorê li bajarokê Sor ê Dêrazorê civînek li dar xist. Di civînê de nûnerên Hêzên Sûriya Demokratîk, Meclisa Leşkerî ya Dêrazorê, Meclisa Sivîl a Dêrazorê û rûspiyên eşîrên Dêrazorê amade bûn.
Di civînê de nûnerên şandeyan axivîn û rewşa dawî li Sûriyê nirxandin û behsa hevdîtinên di navbera MSD’ê û rêjîma Sûriyê de kirin.
Serokê Meclisa Sivîl a Dêrazorê Xesan El-Yûsif diyar kir ku civîn wek hevdîtineke şêwirmendiyê pêk hat û wiha got: “eşkere ye ku her herêmek xwedî taybetmendiyekê ye, taybetmendiya herêma Dêrazorê jî ew e ku bi hevgirtina eşîrên xwe tê nasîn û rola nûnerên van eşîran di giştî dozên herêmê de mezin e. Wek rêveberiya siyasî û leşkerî erka me ye em pêşketinên dawî bi welatiyên herêmê û bi rûspiyên eşîran re gotûbêj bikin.”
El-Yûsif di axaftina xwe de diyar kir ku wan di civînê de hevdîtinên di navbera MSD’ê û rêjîma Sûriyê de û gelek mijarên girêdayî herêmê û rêbazên çareserkirinê gotûbêj kirine.
Fermandarê Meclisa Leşkerî ya Dêrazorê Ehmed El-Xebîl Ebû Xewla di civînê de bersiva gotegotên îdiaya radestkirina herêmên rizgarkirî ji rêjîmê re da û wiha got: “Tu rastiya vê îdiayê tune ye. QSD’ê ev herêm bi xwîna şehîdan rizgar kirine û ne pêkan e radestî tu aliyan bike û tenê wê radestî welatiyên wê yên resen bike. Em bi çareseriya siyasî re ne da ku rûmeta gelê Sûriyê bi hemû pêkhateyên wê were parastin.”
Girêdayî pêşketin û geşedanên hemleya Bagera Cizîrê Ebû Xewla diyar kir ku hemleya wan a rizgarkirina giştî bejahiya herêmê ya di navbera Hesekê û Dêrazorê de di qonaxa dawîn de berdewam dike û wiha got: “Tenê deverek di destê çeteyan de maye û wê di van rojên pêş de bi temamî rizgar bikin.”
Şêx Menaf El-Reca yek ji rûspiyên eşîra El-Cibûr e, di civînê de axivî û piştgiriya xwe ji diyaloga Sûrî –Sûrî re ragihand û banga vekirina deriyê diyalogê li pêşiya hemû pêkhate û aliyên Sûriyê kir.
Di civînê de serokê Buroya Têkliyên Giştî ya Meclisa Sivîl a Dêrazorê Xeyrî Mihemed axivî û piştrast kir ku armanc ji vê civînê ew e ku lêhûrbûnên hevdîtinên di navbera MSD’ê û hikûmeta Sûriyê de ji nûnerên herêmê re bêne ragihandin û wiha got: “Peywira me ew e ku tiştê rû daye bi zelalî ji welatiyan re were ragihandin. Divê agahiya welatiyan ji hemû geşedanên qada siyasî hebe.”
Nûnerên siyasî, leşkerî û rûspiyan civîn lidarxistin
