Lîloz Hisên/ Qamişlo
Endamê Komîteya Perwerdê ya Desteya Fêrkirin û Perwerdeyê ya Kantona Cizîrê Rênas Fetah diyar kir ku di demsala havînê de, wê dewreyên perwerdeyê ji bo mamosteyên refên ku minhacên wan hatine guhertin, bên vekirin.
Desteya Fêrkirin û Perwerdeyê ya Bakur û Rojhilatê Sûriyeyê dest bi guhertina minhacên xwendinê yên asta seretayî, amadeyî û navîn kiriye, ji bo ku tu şaştî û kêmanî nekeve pergala xwendinê, wê saziya minhacan ya girêdayî desteyê li ser sê qûnaxan minhacan bighurîne, li gel guhertina minhacan diviyabû ku mamosteyên dibistanan li gorî minhacên nû xebat bimeşînin, ji ber vê yekê, wê ji bo mamosteyan di demsala havînê de dewreyên perwerdeyê dest pê bikin. Ev perwerdeya bê dayîn jî wê têkildarî şêwazên xwendinê û naveroka minhacan be da ku bi awayekî rast û baş xwendekaran fêr bibin.
Têkildarî vê mijarê endamê Komîteya Perwerdê ya Girêdayî Desteya Fêrkirin û Perwerdeyê ya kantona Cizîrê Rênas Fetah ji rojameya me re axivî.
Rênas Fetah anê ziman ku perwerde tenê ji bo mamosteyên ku minhacên wan ên sala nû hatiye guhertinê wê bê dayîn û wiha pê de çû: “Di sala nû ya xwendinê de wê minhacên xwendinê yên refên 1, 4, 7 û 10’an bên guhertin, wê mamoste li gorî vê yekê perwerdeyê bibînin, herwiha wê li bajar hinek mamosteyên yedek hebin ji bo di rewşên awarte de wan derbasî dibistanan bikin. Wê mamosteyên seretayî û branşan bi giştî perwerde bibînin, wê perwerde li ser du qûnaxan be, ya yekemîn wê navendî be, her bajarek wê komîsyonên wê bên erkdar kirin ji bo dayîna perwerdeyê, ya din jî li bajaran li gorî pêwistiyan wê mamosteyan teyîn bikin û perwerdeyê bidin.”
Rênas Fetha derbarê dema qedandin û dirêjiya perwerdê de wihagot: “Dema qedandina perwerdê û dirêjiya wê li ser minhac dimîne, dibe ku perwerdeya refa yekê hefteyekê dirêj bike û yên din mehekê dirêj bike, dema her minhacekî li minhac bi xwe dimîne.”
Rênas Fetah derbarê giringiya dayîna vê perwerdeyê de wiha anî ziman: “Pêwîste ji bo minhacê nû, şêwazên hatine amadekirin û şêwazên waneyên nû perwerde bên dayîn, divê ji mamosteyan re bê zelalkirin da ku dema perwerdeyê bidin bi awayekî rast agahiyan bighînin xwendekaran. Herwiha mamoste ji bo sala bê amade be û karê xwe bi temamî li gorî minhacên nû bike. Em ê hewil bidin şaştî û pirsgirêkên xwendinê di riya perwerdê de ji holê rakin. Minhac wê nû be li ser mamosteyan, guhertinên cewherî wê çênebûbe, lê şêwaz û wane bi giştî hatiye guhertin ji bo şaştî nebin me ev perwerde giring dît ku em çêbikin.”
Rênas Fetah pirsgirêkên li hember wan derkevin anî ziman:” Ji ber ku perwerde di demsala havînê de ye wê mamosteyên ku perwerdê bigrin zehmetiyek mezin bikşîne, ji ber ku germahî heye ev yek dihêle ku nerehetiyekê li cem mamoste çêbike, ev yek dihêle ku perwerde bi aywayekî hêsan û baş neghêje mamoste. Herwiha di mijara diyarkirina komisyonên ku perwerdeyê bidin hinekî dem dibe û dibe ku rewşên din jî derkevin.”