Li taxa Şêxmeqsûd ya Helebê piştî ku bi salan şerên dijwar lê qewimîn niha hêdî hêdî jiyan lê asayî dibe. Sûka Şêxmeqsûd jî ku di şerde ziyaneke mezin dît û ruxiyabû ji nûve geş dibe. Welatî berê xwe didin sûkê û pêdiviyên xwe yên jiyanî pêşwazî dikin.
Sûka taxa Şêxmeqsûd a Helebê, piştî vegera piraniya niştecihên taxê, ji nû ve geş bû. Lê ji ber topbarana çeteyan sûkê gelek zirar dîtiye û ji ber wê firoşkaran bang li şaredariyê kirin ku alîkariya wan bikin da ku sûkê sererast bikin.
Sûka Xerbî ya taxa Şêxmeqûd ku di sala 1997’an de hatibû avakiirn, yek ji sûkên girîng yên Helebê bû. Beriya êrîşên çeteyan li ser taxê, ji ber erzaniyê pirraniya welatiyan berê xwe didan sûka Şêxmeqsûd.
Piştî destpêkirina aloziya Sûriyê û dorpêçkirina çeteyên girêdayî dewleta tirk û di encama topbaranê de sûkê ziyaneke mezin dît. Li sûkê 700 dikan hatin rûxandin.
JI NÛVE GEŞBÛNA SÛKÊ
Ev nêzî du sale hêdî hêdî jiyan vedigere sûkê. Li sûkê ji nûve dikan tên lê kirin û pêdiviyên jiyanî li sûkê tên dîtin.
Firoşkarên sûkê, ji bo sererastkirina sûkê bang kirin ku şaredarî alîkariya wan bike.
Welatiyê ji pêkhateya Ereb bi navê Ehmed Casim diyar kir ku sûk hêdî hêdî mîna berê zindî dibe û bihayê sûkê jî başe. Ehmed bang li şaredariyê kir deverên ku di encama şer de wêran bûne, sererast bike.
Hevseroka Şaredariya Gel a taxê Velantîna Ebdo destnîşan kir ku wan ji bo çareserkirina banê sûkê projeyek pêşkêş kiriye. Valentîna diyar kir ku ew ji bo çareserkirina pirsgirêkên kanalîzasyona sûkê û çareserkirina sererastkirina rêyan dixebitin.
Di dawiya axaftina xwe de hevseroka Şaredariya Gel a Şexmeqsûdê Valentîna Ebdo destnîşan kir ku ji bo bilindkirina asta sûkê û sererastkirina wê, divê firoşkar bi şaredariya re alîkar bin…ANHA
