Ahmet Aktaş
Li ser derçûna DYEyê ji Rojhilata Navîn, bi taybetî ji Iraqê û Sûriyeyê, gelek gotin û şîrove hatin kirin.
Lê berovajî, DYE’yê bi giştî li Rojhilata Navîn, bingeh û baregehên xwe zêdetir û bi hêztir dike.
Jixwe hatibû ragihandin ku wê li Hewlêrê konsolosxaneya xwe ya li cîhanê herî mezin ava bikin.
Li goreyî daneyên wan ev cih; 200 hezar metreçargoşe ye, wê di sala 2025’an de temam bibe û xercê wê 794 milyon dolar e.
Balyozê Bexdayê jî diguhere û li goreyî daxwiyaniyên rêveberên wan, bi taybetî li Iraqê û Kurdistanê cih û warên xwe yên siyasî û leşkerî, ji berê xurtir dikin.
Bêgûman van amadekariyan li dijî kîjan neyarên xwe dike, ne veşartiye; yên mîna Îranê û Rûsyayê aşkere, yên mîna Çînê û hwd.jî nîv aşkere destnîşan dike.
Helbet li dijî van neyaran, dixwaze kîjan dewletan bixe nava şer û bi wesayeta wan armancên xwe pêk bîne, bi heman şêweyê; hinekan aşkere, hinekan jî niv aşkere destnîşan dike.
Weke mînak dewletên ku pir aşkere dixwaze bixe nava şer, di serî de Tirkiye, Israil û hwd.e
Jixwe Dewleta Tirk, li pir welatan xistiye nava şer û gelek armancên xwe pêkanîye û pêk tîne.
Lê armanca wan a herî kevn û a nuha jî ya herî giring; xistina şerê li dijî Îranê ye.
Hîn di vê derbarê de serkeftî nebû ye, belê dev jê berneda ye û dev jê berna de!
Li aliyê din, paralelî plana bi dewleta Tirk re, bi rêya Îsraîlê re jî, dixwazê armancên xwe yên li Rojhilata Navîn temam bike.
Şerê li xezayê, wisa diyar dibe ku ne serkeftî bûn, lewma nuha bi hinceta ku Hizbullaha Libnanê li gel Îranê ye, berê xwe dane Libnanê.
Wezîrê Karê Stratejik ê Israilê Dermer, li Washingtonê amadekariyên şerê mezintir dikin!
Ji rexekî ve, hewl didin li Başûr hêzên peşmergeyan jî, li gel hêzên leşkerî yên Iraqê, di Wazerata Pêşmerge de bikin yek.
Jixwe nakokiyên navbera PDK û YNK jî hinek rakirin û wisa diyar dibe ku li ser hilbijartinan lihev anîn.
Her wiha li vira, dixwazin bi navê rolekî aştixwaz Nêçîrvan Berzanî jî payedar bikin.
Karê vê propagandayê jî dane nivîskarê navdar ê Inglistanê Qanta Ehmed ê pisporê Rojhilata Navîn e, ew dibêjî “yê karibe karê navbênkariyê baştir bike Nêçîrvan e, jiber ku li gel pir dewletan, mîna Îran, Iraq, Tirkiye, DYE û hwd.têkiliyên wî xweş e”! Û herwiha dikare bibe aktorê aştiya navbera Israil û Filistinê jî!
Bi vî awayî hez dike Nêçîr, weke serokê Kurdan nîşan bide, bi vê şêwazê hêza gelê Kurdistanê him li dijî Îranê, him li dijî Tevgêra Azadiya Kurdistanê bide xebitandin.
Jixwe di heman demê de wezîrên wan ê Tirkimen Aydin Merûf û ê ‘Kurd’ Piştiwan Sadiq jî dibêjin, “divê bi lez Peymana Şingalê ya 9.10.2020 birêve biçe”, ev tê wateya ku yekser îradeya rêveberiya heyî ya gelê Şingalê were şikandin û bixe destê Nêçîrvan Berzanî!
Her dewlet ji bo berjewendê xwe dibeze, divê gelê Kurdistanê jî ji bo berjewendê xwe tevbigere!