Nirxê lîreyê Tirk li bara Dolarê Amerîkayê kêm dibe, pisporên biyanî ên aboriyê dibêjin Tirkiye wê nikaribe ji bin vê krîzê rabe û pêşî banqe, piştre jî şîrket wê birûxin.
Piştî rejîma Erdogan Andrew Brûnson ê ku rehîn hatî girtin bernade, rêveberiya DYA’yê li ser Tirkiyê biryara zexta aborî stand û ji hingî ve lîreyê Tirk li bara dowîzê ji nirx dikeve. Ji serê salê ve lîreyê Tirk 40 ji 100’î li bara dolaran ji nirx ket, têgotin di vê demê de lîreyê Tirk 29 ji 100’î heliyaye.
Li gorî pisporên biyanî ên aboriyê Tirkiye nema dikare ji bin vê krîzê rabe û fatûraya krîzê li pey hev wê li saziyên fînansê û piştre li şîrketan were birîn. Li gorî pisporan pêşî şîrket wê nikaribin deynê xwe bidin û piştre sermiyana banqeyan wê bihele.
Jakob Chrîstensen, yek ji pisporê fînansê ya Bank Danske, ku mezintirîn benqeya Danîmarkayê ye û li gelak welatên cîhanê sermiyana wê heye, got, “Êdî piyaseya biyanî ji bo Tirkiyê senaryoya herî kambax hazir dike, tirsa ku banqe û şîrket wê nikaribin deynê xwe bidin serdest e.”
Wladîmîr Mîklaschewskî, yek ji pisporê heman banqeyê got, “Heke lîreyê Tirk dîsa xwe bi ser hev de neyine, encamen vê wê weke kevirên domînoyê bin, şîrket ku nikaribin deynê krediyan bidin, wê benqe birûxin.”
Lucas Irîsîk, yek ji rêveberê Nîkko Assten Management, ku yek ji koma fînansê ya navdar a Japonyayê ye, ji pisporê din cudatir difikire. Texmîna Irîsîk a ji bo demek kurt wiha ye: “Ji nirx ketine lîreyê Tirk di demeke nêz de wê aboriya Tirk giran bike û wiha çerx wê nema bizîvire.”
Beriya bi çend rojan yek ji saziya fînansê ya DYA’yê Goldman Sachs jî got heke lîreyê Tirk wiha ji nirx bikeve û dolar /lîre bibe 7.1 sermiyana zêde ya benqeyên bi navenda Tirkiyê dibe ku bihelin.
Banqe û şîrketên Tirk wê hilweşin
