Ahmet Aktaş
Ji bo ku em siyaseta qirker a dewleta AKP-MH’ê ya li dijî gelê Kurdistanê nas bikin, divê em siyaseta li Îmraliyê li ser Rêber APO birêve dibe, baş nas bikin.
Êrîşkariya dagirkerî ya li hemû kurdistanê û her wiha destdirêjiyên welatên din, hemû encamên siyaseta li Îmraliyê ye.
Jiber ku dewleta tirk, li ser siyaseta tirkkirin û tunekirina gelê Kurdistanê hatiye damezrandin û bi endamtiya NATO re, bi tevayî li gor berjewendên NATOyê siyaset meşand.
Her wiha, ji bo misogerkirina projeya mezin a Rojhılata Navîn a sedsala 21ê, Receb erkdar kirin.
Êdî, siyaseta derve û hundur, di vê çarçovê de dizayn kirin û dîlgirtina Rêber APO jî li ser vê projeyê pêkhat.
Jiber ku hegemonên cîhanê, felsefe û siyaseta Rêber APO, ji bo sistema xwe asteng û alternatif dîtin, lewma bi plangeriyek navdewletî dîl girtin û şandin êşkencexaneya Imralıyê!
Îca divê ev mijar, berfirehtir were şîrovekirin, ne bi tinê li goreyî armanc û daxwazên Receb, Bahçeli, Berzanî û filan kesan.
Heke di çarçova plangeriya navdewletî de werin şîrove kirin, hingê siyaseta qirker zelaltir tê nas kirin û têkoşîna li dijî wan jî wê baştir were birêvebirin û wê serkeftîtir be.
Imrali, mîna laboratuwarê xebitandin; li goreyî encamên hildidin, stratejî û tektîkan diafirînin û li ser vê bingehê êrîşî gelê Kurdistanê û Tevgêra Azadiyê dikin.
Lewma divê hemû kurdên welatparêz, dostên kurda û kesên demokrat, her dem jixwe pirs bikin, “ka gelo ev Rêber, 26 sal e di bin vê sistema navdewletî ya êşkencê û tecrîdê de û bû 40 meh e bi tevayî têkilî hatiye birîn, ma sax e an na(?), ev kesê ewqas ji bo me berxwe dide, ma gelo em çiqas ji bo rizgar kirin û azad kirina wî dixebitin?” û hwd.
Heke em van pirsan, her gav ji xwe nekin û bersîva wan baş nedin, weke Rêber APO gotiye “êm, herkesê li Îmraliyê binere xwe di wir de nebîne û xwe ne pîve” em ê nikaribin rojev û plansaziyên li gor demê çêbikin, her wiha em ê nikaribin bibin xwedî xebat û têkoşîna serkeftî.
Jixwe siyaset û armancên wan aşkere ye; dixwazin, vê rewşa Rêber APO bidin jibîr kirin û mîna rewşek asayi/normal bidin qebul kirin, wateya vêya jî mirin e!
Wisa diyar dibe ku wê li dijî serkeftinên gerilla, hin pirtir êrîşî xebat û destkeftiyên siyasî û demokratîk bikin; qeyûm, kuştin, girtin, koçber kirin û hwd.
Li dijî vê siyaset û êrîşîn xedar, divê gelê Kurdisitanê û dostên xwe, li şwîna rojevên dewletan ew rojevên xwe biafirînin, paralelî berxwedana li Imralıyê ya Rêber APO û têkoşîna serkeftî ya gerila, di çarçova mafên xwe yên rewa û yasayî de, rabin serîhildanên civakî, bi biryarî û piralî çalakiyên domdar û encamgîr lidar bixin,
Divê ev baweriya jêneveger her hebe: heke Rêber APO rizgar û azad nebe, pirsgrêk çareser nabin.
Lewma divê bêgotin û bênîqaş, teqez azadıya Rêber Apo were xwestin, divê ev mijara sereke ya rojevê be, heke ev mijar misoger nebe, rawestan jî ji me re nabe!
