Şaredariya Ge l a navçeya Tirbespiyê hinek ji daxwazên şêniyên navçeyê bi cih anîn, wekî veguhestina cihê sergo, kolandina bîran. Niha jî şaredarî rêzeprojeyên xizmetguzariyê mîna sererastikirina toreya kanalîzasyonê û qîrkirina riyan amade dike.
Di van demên dawî de piştî rexneyên welatiyan ji ber bêhna qirêj, şaredariya Tirbespiyê cihê sergo veguhest. Her wiha Buroya Jin a Şaredariyê pêngava paqijkirina sûka navendî, pir û çem dest pê kir.
Ji bo çareserkirina pirsgirêka avê li navçeyê, şaredarî di van demên dawî de, 3 bîr di nav baxçeyên navçeyê koland û dar di nav wan baxçeyan de çand. Şaredarî li ser rexne û daxwaza şêniyên navçeyê ji bo pirsgirêka firinan û nebaşbûna nan, mudaxele kir û ew pirsgirêk çareser kir.
PROJEYÊN XIZMETGUZARIYÊ
Piştî ku Meclisa Qamişlo, 25 milyon lîreyên Sûriyê ji bo Şaredariya Gel a navçeya Tirbespiyê veqetand, şaredarî di demên dawî de amadekariyên pêşkeşkirina projeyên xizmetguzariyê dike. Ji wan projeyan sererastkirina toreyên kanalîzasyonê li taxa El-Colan û li ser dirêjahiya El-Muheleq ê başûr sazkirin.
Hevseroka Şaredariya Gel a navçeya Tirbespiyê Sûad El-Hisên destnîşan kir ku wan ji bo diyarkirina rêyên ku pir ziyan dîtine, komîteyek ava kirine û wê di demek kurt de werin qîrkirin.
Ji aliyekî din ve jî, Buroya Jin a Şaredariya Gel a navçeya Tirbespiyê amadekariyên vekirina baxçeyekê li nêzî depoya Fransî li navenda navçeyê dike. Her wiha amadekariyên avakirina çerxeriyekê li rojhilatê navçeyê jî dike.
Her wiha ji bo çareserkirina qerebalixa tirafîkê, şaredarî projeya veguhestina rawestgeha gundan li derdora navçeyê nîqaş dike.
Komîteyên tenduristî û kontrolkirinê ji bo parastina tendrûstiya welatiyan, rojane di nav navçeyê de digerin û çavdêriya madeyên xwarinê dikin…ANHA