Farûk Sakik
Îsal salvegera 25’an a KNK’ê bû. Ji bo wan min sînevîzyonek amade kir. Rastî hin detayan hatim. Me di her kêliyên avakirina yekîtiya neteweyî de Rêber Apo didît. Ji avakirina KUM’ê bigirin hetanî KNK’ê gelek hewldanên wê çêbûne. Di arşîvan de em rastî hin fotografên wî hatin. Bi gelek lîderên Kurdan re hevdîtin pêk anîne. Di van kareyên fotografan de jî me hewldanên wî yên yekîtiya neteweyî dît. Di sala 1995’an de heyetek ji parlementerên DEP’ê û hin kesayetên navdar ku li Ewrûpa dimînin, li Şamê Rêber Apo ziyaret dikin. Di vê serdanê de avakirina KNK’ê tê axaftin. Lê dema ku ev heyet vegeriya Ewrûpa di destpêkê de, di 12’ê Nîsana 1995’an de Parlemena Kurdistan a Derveyî Welat-PKDW ava kirin.
Ji bo avakirina Kongreyê dest bi xebatan kirin.
Di sala 1998’an de dema Rêber Apo li Romayê bû heyetek ji PKDW’ê çû serdana Rêber Apo. Divê serdanê de xebat hetanî kîjan radeyê hatiye ev hatin nîqaşkirin.
Tiştê herî balkêş jî piştî Rêber Apo dîl hat girtin, bi parêzerên xwe re di yekem hevdîtinê de tişta ku xwestî ew bû ku bi lez KNK’ê were avakirin bû. De bifikirin, mirovek dîl hatî girtin, yekem car e parêzer diçin cem wî û ew behsa rewşa xwe, parastina xwe nake. Di destpêkê de behsa avakirina yekîtiya neteweyî dike. Rêbertî tiştek wiha ye. Yên kesan dike Rêber, ew kesê ku gelê xwe ji xwe zêdetir difikire. Rêber Apo kesek wisabû. Ji bo vê yekê jî, gel ji wî re got; Rêber Apo. Rêber Apo xwedî nasnameyek bi vî rengî bû. Lê hin kes, hin tevger û partî dema di xebatên KNK’ê de motîveya Rêber Apo dibînin, dibêjin; Ev saziyek neteweyî ye divê zêde Rêber Apo dernekeve pêş. Aliyên ku tevlî vê saziyê nabin û di bin sîwana KNK’ê de cîh nagirin jî dibêjin, ev sazî Rêber Apo derdixê pêş. Ev sazî saziya PKK’ê ye.
Xebatên Rêber Apo yên avakirina yekîtiya neteweyî ji bîr dikin. Van kesan hevdîtinên Rêber Apo yên bi serokên tevger û partiyên wan re ji hafîza xwe paqij kirine. Bi wan kesan re nîqaşên avakirina yekîtiya neteweyî hatine kirin bi zanebûn dernaxin pêş.
Hin nîqaş jî di dema roja Cejna Zimanê Kurdî de çêbûn. Li herêma di bin dagirkeriya dewleta Tirk de ye derbas bû. Hemû sazî û tevger bi hatina cem hev û daxuyaniyek hevbeş bidana. Di vê daxuyaniyê de wê bal bikişandina hewldanên Rêber Apo yên ji bo zimanê Kurdî û azadiya wî bihata nivîsandin. Dîsa midaxele kirin gotin, di daxuyaniya Cejna Ziman de peyamên siyasî neyên dayin. Rêber Apo; ziman e, yekîtî ye, siyasî ye, dîrok e, pêşeng e û Kurdistan e.
Ji bo doza yek çi kar û xebat hebe, divê Rêber Apo jî di wê hewldanê de hebe.
Rêber Apo Kurdan ji ber çerqa helandina dagirkeran rizgar kir. Em îroj bi tenê van têgehên ku wî rizgar kirî em diparêzin û pêş dixin. Ji bo vê yekê jî di van xebatên parastin û pêş xistinê de teqez navê Rêber Apo derbas bibe.
Hin kes divê ku naxwazin di van platforman de cîh bigirin. Lê navê Rêber Apo wek asteng nîşandin bêwîjdaniye. Tu ferqek di navbera kiryarên dewleta dagirker û helwesta van kesan de tuneye. Herdû alî jî li dû tunekirina Abdullah Ocalan ketine.
