Foza Yûsif di Sêyemîn Kongreya YJC‘ê de axivî û diyar kir şoreşa Jin ku li Rojava dest pê kir, îro li Reqa, Tebqa û Dêrazorê tê pêk tê û got, “Tevlêbûna vê kongreyê jî nîşaneya vê yekê ye.”
Kongreya Sêyemîn a YJC’ê bi durûşmeya ʺBi felsefeya Rêber Apo em ê dagirkeriyê têk bibin, bi pêşengiya jinên ciwan em ê Sûriyeke azad ava bikinʺ li Navenda Çand û Hunerê ya Aram Tîgran li bajarokê Rimêlan ê bi tevlêbûna 800 delegeyên ji tevahiya herêmên Bakurê Sûriyê pêk hat.
Hevseroka Desteya Rêveber a Meclisa Damezrîner a Federaliya Demokratîk a Bakurê Sûriyê Foza Yûsif jî di kongreyê de axivî.
Foza Yûsif got, “Em li pêşberî dijminekî hevpar in, dijminê me pergala desthilatdar e ya ku ked û xebata jin înkar dike. Ev pergal hewl dide bi hemû rêbazan destkeftiyên jinên Rojava û Bakurê Sûriyê têk bibin.”
Foza Yûsif di berdewama axaftina xwe de got, “Divê jin xwedî biryar be, xwedî zanist be, nas bike çawa destkeftiyên xwe bi parêze. Ji vê yekê jî pêwîste di serî de xwe di aliyê fikirî û leşkerî de xurt bike da ku nasnameya xwe biparêze.”
Foza Yûsif anî ziman ku parastina destkeftiyên jin li rojava û bakurê Sûriyê misogeriya parastin û destkeftiyên jin li hevahî Sûriyê ye û wiha dewam kir, “Ji ber ku şoreşa jin li Rojava dest pê kir, îro li Reqa, Tebqa û Derazorê pêk tê, nîşaneya vê yekê beşdarîbûna jinên ciwan ên ji van herêman ji bo kongreyê ye.”
Foza Yûsif di dawiya axaftina xwe de kongre li hemû jinên ciwan pîroz kir û hêvî kir ku kongre encamên girîng ku hêviyên jinan pêk bîne , bigire û diyar kir kongre bi keda şehîdan hatiye lidarxistin…ANHA
Şoreşa jin li Bakurê Sûriyê pêk tê
