Şêniyên bajarokê Til Tewîl ê bajarê Hesekê daxwaza vekirina navendeke tenduristiyê kirin. Rêveberên Komîteya Tenduristiyê ya Hesekê diyar kir ku di demeke nêzîk de wê navend were vekirin.
Bajarokê Til Tewîl 5 km dikeve bakûrê bajarê Hesekê, hêjmara niştecihên wê 5 hezare û Kurd û Ereb in. Her wiha 24 gund jî girêdyaî bajaroke.
Şêniyên bajarokê Til Tewîl ji ber tunebûna dermanxane û navenda tenduristiyê bêzar in, ji ber vê yekê neçar dimînin ku biçin navenda bajêr.
Welatiyê bi navê Hindî El-Xelef got. “Dermanxaneyeke biçûk hebû, ew jî hate girtin, niha em zehmetiyan dikişînin, ne dermanxane û ne jî navendeke tenduristiyê heye. Em bi hêvî ne ku navendeke tenduristiyê were vekirin.”
Welatiya bi navê Emîna El-Elawî jî anî ziman ku ji ber tunebûna dermanxane û navenda tenduristiyê ew neçar dimînin ku biçin bajêr û wiha got: “Dderman û tedawiya bijîşkan jî biha ye.”
Welatiyê bi navê Eymen Tariq jî anî ziman ku bajar 5 km dûr e, di rewşên nexweşiyên giran de xetere çêdibe, li aliyekî din jî di saetên derengî şevê de wesayît tune ne.
Hevserokê Meclisa Bajarokê Til Tewîl Xebat Silêman anî ziman ku mehane civîn têne lidarxistin û daxwazên gel têne guhdarkirin û wiha got: “Em bi zehmetiyên şêniyan dizanin. Wekî meclis me daxwaza vekirina navendeke tenduristiyê pêşkêşî Komîteya Tenduristiyê ya bajarê Hesekê kiriye.”
Tê payîn ku di demeke nêzîk de navendeke tenduristiyê li Til Tewîl were vekirin.
Komîteya Tenduristiyê ya Hesekê di nava 6 mehan de navendên tenduristiyê li navçeyên Zergan, Mergeda, Hol û Erîşê vekirine…ANHA
Li Til Tewîl navenda tenduristiyê tê vekirin
