Lîloz Hisên/ Qamişlo
Projeya Rêveberiya Xweseriya Demokratîk a Bakur û Rojhilatê Sûriyeyê li ser bingeheke xurt hatiye avakirin, tevî astengiyên ku li hemebr derdikevin jî, xebatên ji bo pêşxistina vê projeyê berdewam e û li derdorê tê belav kirin.
Di 10`ê meha Gulanê de di navbera Meclisa Sûriya Demokratîk, Hêzên Sûriya Demokratîk û Rêvebriya Xweseriya Demokratîk de ji bo nîqaşkirina geşedanên dawî, rewşa siyasî, leşkerî û rewşa gelê herêmê civînek sêalî hat li dar xistin.
Derbarê mijarê de cîgera hevserokatiya Meclisa Sûriya Demokratîk Canda Mihemed ji rojameya me re axivî.
Canda Mihemed diyar kir ku ji bo nîqaşkirina mijarên girîng li ser asta tevahî Sûriyeyê pêwistiya rûniştineke wisa hebû û wiha got: “Gelek mijarên girîng yên girêdayî rewşa siyasî, çareseriya aloziya Sûriyeyê, diyaloga sûrî, xeteriyên li pêşiya herêmê, astengiyên li pêşiya Rêvebriya Xweser derdikeve, rewşa gel û xizmetguzariyê di civînê de hatin nîqaş kirin. Gelek kar û xebat ji me tê xwestin da ku em ji nû ve dosyaya aloziya Sûriyeyê bidin pêş.”
Canda Mihemed derbarê rewşa siyasî wiha got: “Di civînê de giringiya diyaloga Sûrî-Sûrî di navbera tevahî aliyan de hate destnîşankirin, herwiha hat diyarkirin ku riyên leşkerî ku ji hêla hikumeta Sûriyê û komên çete ve hat meşandin ev pirsgirêk zêdtir kur kir. Ji ber vê yekê em dibînin ku diyalog û çareseriya siyasî ya herî guncawe.”
Canda Mihemed wiha gotinên xwe berdewam kir: “Di civînê de bal hat kişandin ser hewildanên jinûve zindîkirina çeteyên DAIŞ`ê û çawaniya derketina li hemberî vê xeteriyê. Ji ber ku Zindîbûna DAIŞ`ê xeteriyeke mezin bi xwe re tîne ne tenê ji bo herêmê lê li seranserî cîhanê bi giştî. Li aliyekî din di civînê de rewşa gel û Rêveberiya Xweser bi giştî hate nîqaşkirin. Rêveberiya Xweser projeyeke ne navendî ye û ji bo aloziya Sûriyeyê çareseriya herî guncaw e, ev yek di xwepêşandanên li Siwêdayê ku banga pêkanîna vê projeyê dikin tê nîşandan.”
Canda Mihemed wiha zêde kir: “Di civînê de çawaniya xurtkirina têkiliyan bi dewletên ereb dre jî hate nîqaşkirin da ku hevkariyê bi wan re bê kirin di dosyayên mîna DAIŞ, herwiha di warên aborî, tenduristî û perwerdeyê de.
Derbarê Astengiyên li pêşiya Rêvebriya Xweser Canda Mihemed wiha got: “Rêveberiya Xweser bi îradeya gelê Sûriyeyê hate avakirin da ku gel xwe bi xwe rêve bibin, di van salan de gelek zemetî û astengî li pêşiya rêveberiyê derketin weke êrîşên dagrkeriya Tirk li ser herêma me û armanckirina cihên xizmetguzariyê lê di heman demê tevî van astengiyan kar û xebat tê meşandin, Rêvebriya Xweser li ser bingheke xurt hatiye avakirin bi tevlîbûna tevahî pêkhateyên ku li Bakur û Rojhilarê Sûriyeyê jiyan dikin, tevî zehmetiyan kar tê kirin ji bo pêşxistina vê projeya demokratîk.”
Canda Mihemed axaftina xwe wiha qedand: “Weke Meclisa Sûriya Demokratîk ji bo pêşketina diyaloga Sûrî-Sûrî gelek proje me da destpêkirin di nav de jî kongreyek li ser asta cîhanî wê bê li darxistin di demeke nêz de di bin navê ( Kongreyê Hêz û Kesayetên Demokratîk)” li derveyî Sûriyeyê.
