Kiryarên leşker û çeteyên dagirker yên li Efrînê berdewam dikin. Komên çete yên girêdayî artêşa Tirk a dagirker li Efrînê zextên xwe yên li ser civaka Êzidî û Elewî jî didomînin. Hat ragihandin ku Koma çete ya Feyleq El-Şam û Ketîba El Hemzat zarokên Êzidiyan bi darê zorê rêdikin camiyan û malên Elewiyan jî dikin mizgeft.
Koma çete ya Feyleq El-Şam ên girêdayî artêşa Tirk a dagirker zarokên Êzidî yên gundê Basûfanê navçeya Şêrawa ya Efrînê bi darê zorê rêdikin mizgeftan. Komên çete yên bi navê Ketîba El-Hemzet jî, dibistan û hin malên sivîl ên Elewiyan ên navçeya Mabeta dikin mizgeft û dibistanên Şerîetê. Hat diyar kirin ku kesên vê yekê qebûl nakin jî tên girtin, revandin û îşkence kirin.
Komên Çete yên girêdayê Artêşa Tirk a dagirker kiryarên guherandina demografî û bişavtina gelê Efrînê berdewam dikin. Çete û leşkerên dagirker ku ji destpêka dagirkirina Efrînê û vir ve hemû cih û warên dîrokî, pîroz ên Êzidiyan û Elewiyan tarûmar kirin, niha jî bişavtinê û guhertina ol li ser Êzidî û Elewiyên li herema Efrînê zextan dikin. Ji aliyekî ve komên Feyleq El Şam ên girêdayî Tirkiyê zarokên Êzidî bi darê zorê dişînin mizgeftan, li aliyê din jî komên Ketîba El Hemzet jî dibistan û hin malên Elewiyan dikin mizgeft û dibistanên Şerîatê.
ZAROKÊN ÊZIDÎ BI ZORÊ DIBIN
MIZGEFTAN
Li gorî agahiyên çavkaniyên heremî, hat diyar kir ku komên Feyleq El Şam, li gundê Basûfanê yê navçeya Şêrewa ya Efrînê zarokên Êzidî ji malan derdixin, bi zorê dibin mizgeftan, li ser ola Îslamê dersan didin wan û Quranê fêrî wan dikin. Çavkaniyên herêmî, destnîşan kirin ku kesê bi navê X.K ku nexwest zarokên xwe bişîne mizgeftê li gund rastî îşkenceya komên Feyleqe El Şam hatiye û jineke ciwan a Êzidî revandin û agahî jê nayê girtin.
MALÊN ELEWIYAN
DIKIN MIZGEFT
Li gorî agahiyan, hat diyar kirin ku kiryarên bişavtinê ne tenê li ser civaka Êzidî, di heman demê de li ser civaka Elewiya ya li Efrînê jî tê meşandin. Hat hîn bûnku komên çeteyên Ketîbeya El-Hemzet dibistana gundê Kaxrê ya navçeya Mabeta ya Efrînê veguhestine dibistanek Şerîetê û tenê dersa ola Îslamî tê de didin. Li aliyê din mala jina Elewî ya bi navê Henan Ereba jî veguhestine mizgeft û tê de dersên Ola Îslamê didin.
Hat diyar kirin ku li heman heremê 3 xaniyên Elewiyan ên ji heremê hatine derxistin jî, ji bo veguherînin mizgeftê amadekarî tên kirin.