Hafiz Ahmet Turhalli
Sedsala meya Îroyinde, Pûtê herî mezin kû Mirov ji bo wî hemû temenê xwe xerc dike, pûtê Pereye. Ev pût roja meya iroyin de, ji hemû baweriyan û nêrînan zêdetir xwedî alîgirane. Ji bo em vê rastiyê bibînin, kesayeta xwe û derdora xwe binêrin bes e. Ji hemû aliyên oldaran bigre, kesên ku behsa felsefe û mafan jî dikin, wek sazî dewlet û rêxistinan jî di nav de, pûtê wan yê sereke pere ye! Wê pûtî hefsarê mirovahiyê kiriye destê xwe û bi giranî ew mirovahiyê dide meşandin. Ev rastiya han tu li ser kîjan nirxê mirovî bikolî û lêkolînê li ser pêkbînî, serdestiya pûtê pere eşkere û vekirî xuya dike. Nirxên olan yê felsefe û civakan di dîroka mirovahiyê de cî bi cî bûne, kîjan millet an ol dibe bile bibe, bi pûtê pere hatiye rizandin û şikestin têde hatiye çêkirin. Pûtê pere di nav hemû nirxên ehlaqî, sîyasî, olî, mezhebî û netewî de xwe bi cîh kiriye û neha nav alîgirên van ol, mezheb, nêrîn û aliyan de jî serdeste. Mirov karê bêje, neha hemû kes ji bo pûtê pere, zêdetir îbadetê bike di nav pêşbirkêde ye. Îbadet a ku em behsa wê dikin, tu çiqas dema xwe ji bo wê tiştî xerc dikî, mebest ji îbadetê ew e.
Qur’ana pîroz dema behsa bawermendan dike weha ferman dike:Yên ku li piyane, roniştîne, ser hêlên xwe paldayine û Xwedê bi bîr tînin. Li ser afirandina erd û asîmanan dihizirin (di fikirin). Dibêjin: “ Xwedayê me! Te ev afirandin bê wate û vala pêk neaniye, em te ji hemû kêmasiyan paqij didêrin. Me ji ezabê agir biparêze”. (Ali-Îmran 191)
Divê mirov tê bigîhije kesên Xweda bi bîr tînin, îbadta herî mezin pêk tînin: Lewre kesên bawermend dema di peyivin ne vala dipeyivin, hizra wan tê ser zimanê wan, baweriya wan tê ser zimanê wan, jiyana wan dibe hizir û gotara wan. Kesê hizra wî, gotara wî û jiyana wî li ser çibe, ew ji wê tiştêre îbadetê dike û bi wî tiştî bawer e.
Roja meya îroyin de kê ji bo çi û çiqas hizir, axeftin û jiyanê dike? Ev pirs baweriya kesayetan radixe berçavan. Em dibînin mirovahî zêdetirê dema xwe ji bo çi xerc dike: Pere û desthilat!
Kesê îro ji Mûsa , ji Îsa, ji Muhemmed, ji Konfuçyus, ji Buda û ji Sosyalîzmê bawer dikin, neha zêdetirî dema wan ji bo pere û qezenckirina Pûtê pere derbas dibe. Kapîtalîzm ku her tiştê wî Pere ye, neha bi şiklekî vekirî, di nava malbata mirovahiyê de bi ser ketiye. Kesê dibêjin em oldarên Îslamê ne, Nimêjan dikin û dibêjin em ji Xwedê bawer dikin %90 dema wan ji bo civandina pereyan derbas dibe. Hemû alî ji bo Pûtê pere bilind bikin di nav kar û kiryarandene. Pûtê pere Misilman, File, Cuhî, Sosyalîst kirine ebdê xwe. Cîhana Îslamî, ji jêr heta jorê, ji bo pereyên wan zêdetir bibin, di nav şer û kuştinandene. Erdoxan û hevkarên wî, van wehşetan ji bo pûtê pere pêk tînin. Derûdora xwe bi şefaata pereyan diparêzin, wan bi pere têr dikin. Nirx tenê ji bo wan yeke, ew jî pûtê pere ye.
Divê kesên ji Xwedê bawer dikin, ji nirxan bawer dikin, Pûtê pere wek Hz Îbrahîm û Hz Muhemmed bişkînin.