Nivîskar Enwer Elman diyar kir ku bêdengiya hikûmeta Herêma Kurdistanê li hember dagirkeriya Tirkiyê tê wateya qebûlkirinê û got; “Ji ber lewazbûna fikra netewî, di nava Kurdan de xiyanetkar hene.”
Nivîskarê Kurd li Elmanya Enwer Elman derbarê dagirkeriya dewleta Tirk li ser xaka Başûrê Kurdistanê û bêdengiya hikûmetê de axivî û diyar kir ku bêdengî tê wateya qebûlkirinê.
Enwer Elman diyar kir ku timî dijminên Kurdan ji bo berjewendiyên xwe hevdû girtine, dijî Kurdan şer kirine û wiha dewam kir; “Tirkiye jî sûdê ji vê digire. Ger bipirsim çima hikûmeta Iraqê û Herêma Kurdistanê li hemberî dagirkeriya Tirk li ser Başûrê Kurdistanê bêdengin? Ji ber ev bê helwestî tê wateya qebûlkirina dagirkeriyê.”
Elman bal kişande ser hebûna baregeh û navendên leşkerên Tirk li herêma Behdînan û got; “Ev herêm dibin kontrola PDK’ê de ye. Sedema destûrdanê, ji ber berjewendiyên li gel dewleta Tirk e. Kurd ketine ber metirsiyên navnetewî. Kurd bi xwe jî ne yekgirtî ne. Ger yek bin, dikarin li hemberî hemû êrîşan rawestin.”
Elman diyar kir ku divê Kurd ji bo fikra netewî werin amadekirin. Elman got; “Niha fikra netewî tam nehatiye famkirin û lewaze. Ji bo wê em dibînin xiyanetkar û xwefiroş hene.”…ROJNEWS
Bêdengî qebûlkirina dagirkeriyê ye
