Endama Meclîsa Jin ya PYD’ê a li Efrînê Şoreş Xelîl diyar kir ku jinên Kurd ji bo tevahiya jinên Sûriyê çavkaniya hêz û hêviyê ye. Şoreş bal kişand li ser êrîşên li dijî jinan û wiha got, “Çi li Şengal, Efrîn, Kobanê dibe, çi jî li Siwêdayê dibe kujer yek in.”
Şoreş Xelîl Endama Meclîsa Jin a Partiya Yekîtiya Demokratîk PYD li Efrînê derbarê destdirêjiya li ser jinê û bi taybet revandina jinên Siwêdayê got, “Di dîrokê de; her jin rastî destdirêjiya û şîdeta zihniyeta zilamê serdest hatiye. Heya roja me ya îro, jin ji bo berjewendiyên desthilatdariyê tê kuştin, tecawizkirin û revandin.”
JIN ÇIRÛSKA HÊVIYÊ YE
Xelîl bi bîr dixe ku jina Kurd di heyama Şoreşa Rojava de pêşengtî kiriye û ev tişt anî ziman: Jinên Rojavayê Kurdistanê di aliyên siyasî, dîplomasî, leşkerî, civakî û aborî de pêşengtiya şoreşa zihnî ya Rojavayê Kurdistanê kirine. Jina Kurd ji bo jinên tevahî Sûriyê û cîhanê çirûska hêviyê ne. Li kêleka jina Kurd, jina Sûriyê jî sekiniye. Xelîl dewam dike: Pêşengtiya jina Kurd ji Şoreşa Rojava re bala jina Sûriyeyî jî kişande ser xwe. Bi vî rengî jî jina Sûriyeyî erkên pêşengtiya Şoreşa Rojava girtin ser milê xwe û di çeperên têkoşînê de gihaştin asta şehadetê.
JINA PÊŞENG HEDEF TÊ GIRTIN
Xelîl dibêje ku ev rêxistinbûna jinê li kêfa desthilatdaran nehat û asta destdirêjî û gefên li ser jinan zêde kirin. Xelîl êrişên dagirkeriya dewleta Tirk û çeteyên DAIŞ li ser Efrînê û Siwêdayê weke mînak girte dest û ev tişt got: Ji ber ku Erdogan dixwaze sîstemek cinsiyetparêz li Tirkiyê û herêmê ava bike, tevî çeteyên xwe êrişî cihê herî birêxistinkirî li Sûriyê Efrîn kirin. Li Efrînê jinê jiyan û polîtîka bi rê ve dibir. Naxwazin jin serî hilde. Ji amûrekî bêtir nagirin dest. Ji ber vê yekê di serî de jina pêşeng a ku bi paradîgmeya Şoreşa Rojava re hatiye afirandin û bandor li tevahî jinên Sûriyê û cîhanê kiriye, li Efrîn û piştre li Siwêdayê hate hedefgirtin.
KUJER YEK E
Xelîl destnîşan dike ku komkujiya vê dawiyê li Siwêdayê qewimiya destê zihniyeta Erdogan û çeteyên DAIŞ tê de heye û got: Ti ferq û cudahî navbera vê komkujiya Siwêdayê û ya Şengalê de nîne. Heman zihniyetê ev qetlîam pêk aniye. Çi li Şengal, Efrîn, Kobanê dibe, çi jî li Siwêdayê dibe. Kujer yek e. Peyama hemûyan jî ev e; nabe jin ji bo azadiya xwe serî hilde. Lazime jin her di nava koletiyê de bijî û ji serdestan re bibe amûrê kirîn û firotinê.
Endama Meclîsa Jin a Partiya Yekîtiya Demokratîk PYD Şoreş Xelîl di dawiya nirxandinên xwe de komkujiya li Siwêdayê şermezar kir û bang li tevahî jinên cîhanê kir ku; erkên xwe yên mirovî pêk bînin û ev tişt anî ziman: Pêwîste hemû jinên dunyayê li dora têkoşîna jinê xelek bigirin. Ancax bi hişmendiya pêşeng a têkoşîna azadiyê jin rizgar bibe. Ev kiryarên dermirovî derheqê jinan de wê berovajî fikrandinên serdestan, asta têkoşîna jinê bilinditir bike. Wê israra me ya azadiyê jî tekûztir bike.
Şîlan XOCE
