Nûnerên KPCD yên ku beşdarî Yekemîn Kongreya KPCD- Jin a Bakurê Sûriyê bûn diyar kirin ku deweleta tirk a dagirker li hemberî sîstema Neteweya Demokratîk a ku li Bakurê Sûriyê hatiye rûniştandin, polîtîkeyên tirkkirinê dimeşîne û anîn ziman ku ew ê li hemberî hemû pergalên desthilatdar, têkoşînê bikin.
Nûnerên hemû bajar û herêmên Bakurê Sûriyê yên ku tevlî Yekemîn Kongreya KPCD-Jin a Bakurê Sûriyê bûn, li ser girîngiya lidarxistina kongreyê axivîn û diyar kirin ku lidarxistina kongreyê di vê pêvajoya hesas de ji bo jinan serkeftinek e mezin e.
Gulîstan Elî Ebdo ku ji herêma Şehbayê hatibû tevlê Kongreyê bû li ser armanca tevlêbûna xwe wiha got: “Ez tev li kongre bûm da ku, rastiya polîtîkeyên dewleta tirk a dagirker derxînin holê, ku zimanê xwe li ser gelê Efrînê ferz dike.”
Gulîstan destnîşan kir ku di nava salên borî de li Efrînê hemû pêkhateyan bi zimanê xwe yê dayîkê perwer didîtin, piştî hate dagirkirin dewleta tirk zimanê xwe ferz dike û hemû zimanên din jî înkar dike.
Gulîstan di berdewama axaftina xwe de diyar kir ku li Şehbayê tevî hemû astengiyan ew teslîm nebûn û wiha dewam kir: “Me xwe di aliyê pewerdeyê de ji nûve bi rêxistin kir. Me dibistan vekirin û dest bi pêşwazîkirina xwendekaran kirin. Em tekez dikin ku em tu carî dev ji zimanê xwe bernadin û em ê bi hemû awayan zimanê xwe biparêzin.”
Nebîha Elî jî anî ziman ku lidarxistina kongreyê di vê pêvajoya hesas de ji bo jinan serkeftinek e mezin e.
Nebîha destnîşan kir ku ew tu carî derfet nadin dewleta tirk a dagirker ku armancên xwe pêk bînin, çanda gelan tune bike û zimanê xwe li ser şêniyên Efrînê ferz bikin û wiha dewam kir,”Dewleta tirk a dagirker û çeteyên wê dibistanên Efrînê veguherîne girtîgehan û li wê derê kiriyarên hovane pêk tîne.”
Di dawiyê de Nebîha diyar kir ku kongreya wan ji bo hemû zehmetiyên li pêş ziman rabin pir girîng e…ANHA
Em ê li hember Tirkkirinê têkoşînê bikin
