Akademî stûna sereke ya avakirina civaka exlaqî û polîtîk in û roleke girîng di pêşxistina zanista civakê û rakirina hişmendiya desthilatdariyê de dilîzin. Akademiyên bîrdozî yên ku li Bakurê Sûriyê hatine vekirin li ser vê bingehê dixebitin.
Bi pêvajoya Şoreşê re, li Rojava û bakurê Sûriyê akademiyên perwerdeyê hatin vekirin. Akademiyên bîrdozî ku li ser bingeha neteweya demokratîk roleke girîng di birêxistinkirina civakê û xwenaskirinê de dilîze.
Piştî rizgarkirina bajarê Minbicê ji çeteyên DAIŞ‘ê, akademiyên pewerdeyê hatin vekirin û beşeke mezin ji civakê di akademiyan de mezûn bûn.
Akademiyan heya radeyeke berbiçav dikarîbû fikrên paşverû ji hole rake û rastiya jinan bi civakê bide naskirin.
Ji perwerdekarên Akademiya Bîrdozî ya Şehîd Îsmaîl Mûsa, Mehmûd Bekirî derbarê akademiyan de wiha got: “Di dema dagirkirina çeteyên DAIŞ‘ê ya Minbicê de fikrên DAIŞ‘ê di mêjiyê gelek kesan de hatibûn çandin, vê yekê bandoreke neyinî li tevahiya civakê kir. Akademî bi armanca rakirina van fikran hatin avakirin.”
Mehmûd Bekirî destnîşan kir ku perwerdeyên li akademiyan li ser bingeha neteweya demokratîk, avakirina civakeke exlaqî û polîtîk, wekheviya di navbera jin û zilaman de têne dayîn.
Li bajarê Minbicê bi giştî 7 akademî hene, 4 jê leşkerî ne û yek jî ya jineolojiyê ye.
Ji dema vekirina akademiyan ango piştî rizgarkirina bajar ji çeteyên DAIŞ‘ê, li Akademiya Şehîd Îsmaîl Mûsa ya Bîrdozî 17 dewre hatin vekirin û bi hezaran kes jê mezûn bûn. Her wiha 5 dewreyên perwerdeyê ji bo mamosteyan hatin vekirin, tê de derdora 4 hezar mamosteyan perwerde dît.
Bekirî anî ziman ku armanca pewerdeyan avakirina mirovên azad û civakeke demokratîk û rakirina fikrê nîjadperest û pêşxistina çanda jiyana hevbaş e…ANHA
Akademî hişmendiyeke nû pêşdixin
